Bru lak let ṭan hun atan November 2016 rawt

Bru lak let dan tur ngaih-tuahtu, Mizoram State Level Core Committee on Bru Repatriation chuan Ministry of Home Affairs (MHA) phût angin Tripura Bru relief camp paruka Mizoram Bru awmte Mizorama hruai kîrna tur, Movement Plan chu MHA-ah a thawn tawh a; Bru lak let ṭan hun atan kumin November rawt a ni.

Thu dawn danin, MHA chuan Mizoram sorkar chu Bru lak let dan tura a ruahmannate May 31, 2016 aia tlai loah MHA-a thehlut turin a hriattir a, hun tiam aia hmain Mizoram sorkar hnuaia Mizoram State Level Core Committee on Bru Repatriation chuan Movement Plan an duante MHA-ah an thawn a ni.

Movement Plan anga Bru hruai kîr tur chhin-chhiah chu chhungkaw 3,455 niin, mi 20,700 chuang
an ni a, chung zinga 11,500 chu naupang an ni.

Bru hruai kîr hun atan fûr ruahtui tlak tawh loh hnu, November 2016 rawt a ni a; a hun tichiangtu tur erawh chu MHA a ni thung.

Kum 2015-a Bru lak letna tur Road Map 4-ah khan sum hman tura ruahman cheng nuai 6800 a ni a, Central-in cheng nuai 970 a rawn pe chhuak tawh. Mahse, Bru zingah Mizorama lêt duh an awm mumal loh avangin sum tam tak hman lohin a awm a; sum la hman lohte chu kumina lak letna turah hman tura tih a ni a, a daih loh chuan sorkar laipuiah dil belh a ni ang.