KHAWTHLIR

Thisen pe

Sihphir bial KṬP chuan Inrinni khan Aizawl Civil Hospital tan thisen unit 35 an pe a, a petute mipa 32 leh hmeichhia pathum an ni. Saiha Joint YMA pawhin YMA Day pualin Inrinni khan Saiha District Hospital tan thisen unit 33 an pe a, a petute mipa 24 leh hmeichhia pakua an ni.

YMA-in tanpui

Tlungvel Gate Veng branch YMA chu Inrinni khan an venga cancer vanga hna thawk thei lo B Vanlalringa lo-ah hnatlangin an feh a, sawhthing an linsak bakah, buh an tuh. Hnatlangah hian mi 60 chuang an thawk chhuak. New Serchhip Bazar branch YMA pawhin Inrinni khan hmeithai in pahnih hnatlangin an thawm ṭhatsak.

Motor chesualah thi

May 28, 2016 chhun dar 1 vel khan Baktawng leh Hmawngkawn inkarah pick-up a chesual a, mi 15 chuang zinga pakhat, Lalpekliana (13) s/o Thangchawllova a hmunah a thi. Mi dangte pawh an hliam a, hliam zinga pathum chu State Referral Hospital-ah lak an ni. Motor hi Ziona, Baktawng Tlangnuam ta niin, a fapa Thangchheuva'n a khalh a, kohhran hnatlang tura kal an ni.

TKP Ramthim Ni

Nimin Pathianni kha 'ṬKP Ramthim Ni' a ni a, Mizoram hmun hrang hranga ṬKP unit-te'n an hmang. Kumina ṬKP Ramthim Ni thupui chu 'I puan-in hmun chu zauh rawh' tih a ni a; missionary-te leh Mission rawngbawlna pualin an ṭawngṭai rual a ni.

Missionary retreat

Mizoram Synod Mission Board (SMB) hnuaia Home Mission leh Cachar Tlangram huam chhunga missionary-te puala buatsaih, Missionary Retreat ITI Veng Kohhran biak-ina neih chu nizan khan a ṭiak. Missionary Retreat-ah hian missionary 1,074 leh an chhungte an tel.

Damdawi-in tanpui

St. Pauls HSS, 1991 batch-te chuan an silver jubilee tlin lawmna atan Inrinni khan Aizawl Civil Hospital leh Refferal Hospital, Falkawn hnenah poor fund atan Rs. 10,000 ve ve an hlan.