6,055 hnenah nau neih lawmman pe

Sorkar kum kal ta 2015-16 chhung khan, Janani Suraksha Yojana hnuaiah sorkar enkawl dawmdawi-ina nau nei mi 6,055 hnenah nau neih lawmman pek a ni a, lawmman atana sum pek zat chu Rs. 39,44,500 a ni.

National Health Mission (NHM) hnuaia Reproductive and Child Health (RCH) hotute sawi danin, JSY hnuaiah hian nu nau neite hnenah lawmman pek theih a ni a; lawmman dawng thei turin nu, nau pâite chu Health sub-centre-ah an inziah luh a ngai a, vawi thum tal sub-centre-ah an inentir tur a ni.

JSY lawmman hi nau neih vawi khatah thing-tlanga chengte hnenah Rs. 700 leh khawpuia chengte hnenah Rs. 600 pek a ni. RCH hotute chuan, Aizawl khawpuia cheng zingah mahni ina nau nei an la awm thin nia sawiin, nau pâi laia sub-centre emaw, doctor emaw pan nacháng hre lo pawh an la awm niin an sawi.