KHAWTHLIR

Faina Hapta 2020 puala faina lama intihsiakna kal zelah Serchhip District Sanitation Task Force Committee ruahmanna angin Serchhip District MJA-te'n nimin khan Serchhip khawpuia pisa hrang hrangte faina lama hma an lak dan an enfiah. MJA-te hi hlâwm thumah inṭhenin, pisa fai an thlang chhuak a, chungte chu ṭum khat an endik leh dawn a ni.

State Referral Hospital (ZMC)-ah nimin khan Covid-19 vei mi pahnih dah luh an ni a, anni nen SRH-ah hripui vei mi 26 enkawl mek niin, ICU-ah mi pahnih leh Isolation Ward-ah mi 24 an awm. SRH-ZMC Bulletin tarlan danin, ICU-a enkawl zinga pakhat zawk chu oxygen pek chhunzawm zel a ni a, ward-a awmte zingah ngaihtuahawm an awm lo.

Aizawl District Level Standing Committee chu nimin khan an chairman R Lalramnghaka, bawrhsap hoin DC conference hall-ah an ṭhu a, Electoral Roll Special Summary Revision neih mekah draft roll chu November 16, 2020-ah tàr chhuah a, final roll chu January 20, 2021-ah tihchhuah tur a nih thu tarlan a ni. ECI-in polling station pakhatah voter 1,500 aia tam lo turin ruahman tura a tih pawh bawhzui a ni ang.

Hlimen Local Council, Branch YMA leh Hlimen Chhantu Committee chuan thuchhuah inṭâwm siamin, Hlimen rama Serluia nungchate chu humhalh a nih thu leh bomb, generator, túr leh rû hmanga man khap tlat a nih thu an tarlang. "October 15 - November15, 2020 inkarah eng hmanrua hmang pawha luia nungchate man khap tlat a ni. A tilui man an nih chuan Rs. 2,000 chawitir bakah, an chungthu rêl zui a ni ang," an ti.

Zo Reunification Organisation (ZORO) chuan, tun hnaia Assam sorkarin Mizoram ramri a nék chiam tih tarlangin, Assam sorkar chêt dan chu tualṭo hnamte chanvo (indigenous peoples rights) páwngnèkna dik lo taka an ngaih thu leh an dem thu an tarlang. ZORO thuchhuah chuan, "Kan ramri hi a nih dan phung chiang taka kan hriat a, kan pawmpui a nih loh chuan tu sorkar mahin an sawnin an nék thiang lo a ni," a ti.