Lunglei MNF-te'n sorkar an dem

MNF sub-headquarters, Lunglei hruaitute chuan Inrinni khan Lung-leiah thuthar thehdarhtute an kâwm a; an president Lawmawma Tochhawng chuan, Supply department-in ration chini an pek chhuah theih loh thu leh IWMP scheme hnuaiah cheng vbc. 500 chuang an pawngsual niin a sawi.

Lawmawma Tochhawng chuan, tun hnaia Home minister R Lalzirliana'n, MLPC Act hnuaia Mizoram sorkarin zu a zawrh vanga sipai thite chu MNF-in sorkarna an chelh laia an lakte an nih thu a sawi chu rem leh rem loa inphatmar tumna a nih thu sawiin, sorkar hlui a puhmawh daih chu mak a tih thu leh zu zawrh phalna petute sawi âwma an ngaih loh thu a sawi.

Lunglei MNF President hian MNF party-in sorkarna an chan laiin tihsual leh tih dik loh palh tam tak an nei tih an hai loh thu sawiin, mipuite ngaihdamna an dil thu a sawi a; MNF-in sorkarna a chang leh a nih chuan mipuite tana ding an nih angin, mipuite nena thawhhona ṭha nena inhnimhnaih leh thawhhona ṭha neih reng an tum thu a sawi bawk.

Lunglei MNF treasurer Dr K Pachhunga chuan, a zawng azain sorkar sawichhiat a ṭul loh thu sawiin, an kal dik lohna leh ṭhat lohnaah erawh chuan finchhuah a ṭul thu a sawi a; sokar laipui programme hrang hrang an kalpui dan erawh chu mipuiin an chhawr tâwk loh avangin rilru natthlak an tih thu a sawi.

Dr K Pachhunga chuan, IWMP, BADP, NEC, NLCPR aṭanga sum hmuhte chu a nihna tur ang takin sum hman ni se chuan Mizoramah hmasawnna rahbi thar hmuh a nih tawh tur thu a sawi a; sorkarin Food Security a kalpui hnuah vawi khatmah chini sem a la ni lo chu mak a tih thu a sawi bawk.