Sorkarin MIRSAC map siam a ṭangkaipui

Directorate of Science & Technology hnuaia Mizoram Remote Sensing Application Centre (MIRSAC) chuan, satellite aṭang-in Mizoram hmun hrang hrang an zir chiang ṭhin a, satellite aṭanga map an siamte chu sorkar department-te'n an hmang ṭangkai hlea thu dawn a ni.

MIRSAC-in satellite map an siamte chu department-te'n sorkar laipuia detail project report (DPR) an thehluh dawnah an hmang ṭangkai a; leilung chhiat-na chi hrang hrang - lir-nghing leh a kaihhnawih te, thlipui leh lei tawlh leh leimin theihna hmunte hriat nan an hmang ṭhin niin an sawi.

MIRSAC hotute sawi danin, MIRSAC hi kum 1988-a din a ni a, Planning department-a Science & Technology and En-vi-ronment Cell hnuaiah inrêl-bàwlna hran neiin an awm.

Indian Space Research Organisation (ISRO) kaltlanga satellite aṭanga Mizoram hmun hrang hrang thlalakte chu map-a siamin, a kaihhnawih sorkar department hrang hrangah an pe ṭhin a; satellite-in thla a lakte chu a hmunah kal chilhin, an zir chian hnuah map an siam ṭhin.

Sorkar department-te hna-thawhna tur hmun leh a ram leilung awm dan te, ram âwih dan te, lui leh kawr awm dan te, kawngpui nena a inhnaih dan te, ramngawin a huam chin te, hna thawhna atana ram ṭha leh hman tlak, a huam zau dante leh a ram leilung awm dan hrim hrimte satellite aṭanga a lan dan zir chiang a nih hnuah map an siam ṭhin a ni.

Sericulture department

Sericulture director Lalrinmawia chuan, MIRSAC map siam chu an department hmalakna atan a pawimawh tih sawiin, "Pangang chaw tur nauthak te, búl leh thil chi hrang hrang kan phun a, hma kan lak dawnah a hmunhma hriat nan kan chhawr ṭangkai a. Mugha pangngang te, Mulbery leh a dang-te an ṭhatna tur hmun pawh hriat a awlsam phah a, MIRSAC map hmangin Central-ah project-te kan siam a, Central pawhin an lo pawm duh bik ṭhin," a ti.

Lalrinmawia sawi danin, Central Silk Board-in North East Space Application Centre (NESAC), Shillong hnenah sum a pe a, NESAC chuan MIRSAC hnenah hna thawhna tur pe ve lehin, MIRSAC chuan Sericulture department tana ṭang-
kai turin Mizoram dinhmun zir chian-na map a siamsak a ni.

MIRSAC hotute chuan, Sericulture tan hian Mizoram pum map siamsak an tum a; Aizawl, Lunglei, Champhai, Saiha, Lawngtlai district-te chu Sericulture Potential Area Maping tia vuahin map an siamsak tawh a, Serchhip district leh Kolasib district an siamsak leh mek a ni.

RD department

Rural Development (RD) department pawh MIRSAC map an siam an chhawr ṭangkai hle nia sawiin, RD director V Lalsangliana chuan, Integrated Watershed Manangement Programme (IWMP) an kalpuinaah an chhawr hle niin a sawi. IWMP hi tunah chuan Prandhan Mantri Krishi Sanchai Yajona (PMKSY) tiin a hming thlak a ni tawh.

V Lalsangliana sawi danin, RD department hian kum 2009 aṭang khan DPR an siam reng rengah MIRSAC map siam an hmang vek tawh a, kum 2013 aṭanga 2015 thleng khan satellite thlalak chu an project area bikah an hmang nasa zual. Map-te chu Ministry of Rural Development hnuaia Department of Land Resources-in an ngen tawh avangin an hmang ziah ṭhin.

RD Director chuan, PMKSY hnuaiah project 89 an nei tih sawiin, ram hectare 3,70,000 vel a luah a, project cost pawh cheng vbc. 560 vel a ni tih sawiin, "Heng atan hian MIRSAC map chu DPR-ah kan hmang ṭangkai a, an tel lo chuan kan ti hleithei tawh lo. Central pawhin kan hmalakna an pawm phah ṭhin," a ti.

Department dang

Agriculture joint director Dr Saithantluanga pawhin MIRSAC map siam an hmang ṭangkai tih sawiin, "Map chhungah hian ram âwih dan te, ram hman mek leh la hman loh te, leilung awm dan te, tui lak theihna tur hmunte leh thil hrang hrangah kan hmang ṭangkai hle," a ti a; Central-a DPR siamna atan pawh an hmang ṭangkai tih a sawi.

Environment & Forest department pawhin NLUP kalpuina atan MIRSAC map an hmang
ṭangkai hle a; Mizorama mau awm zat leh district hrang hranga mau awm dan zir chian nante an hmang ṭhin. Disaster Management & Rehabilitation department leh department dangte pawh ṭangkai takin an hmang
ṭhin a ni.