Rangkachak suam thubuai Court-in Jasjit Singh bail-in a chhuah CBI chhuitir tura rawtna sorkarah thlen

December 14, 2015 zana Aizawl dáia rangkachak tawlhrûk suamnaa inhnamhnawiha puh, 39 Assam Rifles commandant Col. Jasjit Singh chu nimin khan bail-a chhuah a ni. Hetih lai hian, Mizoram police-te chuan rangkachak tawlhruk suam thubuai chu Central Bureau of Investigation (CBI) chhuitir tura rawtna Mizoram sorkar hnenah tun hnai khan an thlen.

May 5, 2016-a Mizoram police-a Special Investigation Team (SIT)-in an man, 39 AR commandant Col. Jasjit Singh chu nimin khan Aizawla District & Session judge Lucy Lalrinthari'n bail-in a chhuah a; phalna nei loa Mizoram chhuah-san lo tur leh police-te'n an koh apianga kal turin a hriattir.

Thu dawn danin, Col. Jasjit Singh-a ukilte chuan Jasjit Singh chu indonaah a hnungzáng ruh (spine) a tihnat avangin harsatna a tawh thu leh India tana indona lo hmachhawn tawh a nih thu sawiin, bail phalsak turin Court an dil. Sorkar ukilte'n Col. Jasjit Singh chu chhuah a nih chuan an thil chhuina a tihbuai theih thu sawi mah se, Court chuan bail dilna a phalsak a ni.

Vanglaini palai zawhna chhangin IGP Zorammawia chuan, rangkachak suam thubuai chu Mizoram sorkarin CBI chhuitir turin thutlukna siam mah se, Mizoram police-te pawhin an chhuina an chawlhsan kher dawn lo tih sawiin, "Thubuai chungchang hi chhui chhuah ngei kan duh avangin CBI chhuitir turin tun hnai khan Mizoram sorkarah rawtna kan thlen," a ti a; Mizoram sorkar aṭanga chhanna an la hmuh loh thu a sawi.

Zorammawia chuan, thubuaia inhnamhnawiha rinhlelh zingah hnam dangte an awm avangin thu inzawhfiahnaah ṭawngkamah harsatna an naute'n an neih thu a sawi a, "CBI lamin an chhui chuan ṭawng lama harsatna a awm dawn lo a, hnu chhui a chak phah thei ang. Chu bakah, thubuaia inhnamhnawiha ngaihte hi armed force-te an ni a, CBI tan thil tih a awlsam zawk dawn a ni," a ti.

IGP sawi danin, rangkachak rûkbo chu hmuh ngei tuma beih a nih avangin state dangahte chhui a ngai thei a, chu'ng hunah chuan Mizoram police-te'n harsatna an tawk thei. CBI-te'n thubuai an chhui a nih chuan, state danga thil buaipui ngai a awm a nih pawhin a awlsam zawk dawn. Arm smuggling thlenga chhui a ṭul phei chuan international thlenga thil buaipui a ngai dawn a, chu'ngte chu Mi-zo-ram police-te tan a buai-thlak dawn a ni.

An hnu chhuinaah an bei-dawn vanga CBI chhuitir tura rawtna thlen an ni lo tih sawiin Zorammawia chuan, "A insuamna hrim hrim thubuai phei chu thil harsa tak a ni lo," a ti.

Zorammawia chuan, CBI-in thubuai an chhui dawn a nih pawhin, Mizoram police-te nena chhui dun (joint investigation) emaw, an kuta thubuai lâk tawp turin emaw thutlukna an siam thei tih a sawi a; CBI-in thubuai an la tawp dawn a nih pawhin, Mizoram police-te'n an chhui ve tho dawn a, CBI nen indîpna tur a awm lo niin a sawi bawk.

Hetih lai hian, chief minister Lal Thanhawla chuan May 20, 2016 khan Congress Bhavan-ah rangkachak tawlhrûk suam thubuai chu CBI kuta pek a la ngaih mai theih thu lo sawi tawh a, "Rangkachak tawlhruk rûkbo thubuai hi Lawngtlai bank rawk ang mai mai a ni ve dawn lo. Rangkachak thubuai hi a lian hle a, an rûkbona hi a rei deuh tawh a, kár a awm tawh a, rangkachak ber hmuh chhuah a la ni lo," a ti a; police-te hnathawh chu chhuanawm a tih thu a sawi a ni.

December 14, 2015 zana Mel-thum dái, Zampuimanga thlân bula rangkachak cheng vbc. 14.2 hû tawlhrûk suam leh rûkbo thubuai chhui tur hian Mizoram police-te chuan special investigation team (SIT) an din a, thubuai kaihhnawihah hian mi 14 an man tawh.