Scho' dawng lote inhriattir turin an ngen

MZP leh MSU hruaitute chuan Post Matric Tribal Scholarship chungchangah Mizoram Scholarship Board (MSB) hotute an kâwm a; scholarship la dawng lo zirlaite chu inhriattir turin an ngen.

MZP thuchhuah tarlan danin, MSB-in scholarship la dawng lo zirlaite inhriattir tura a tih hnuhnung berah mi 6,900 vel an inhriattir a; harsatna eng emaw vangin bank account-ah scholarship thun theih a nih loh avangin post matric scholarship la dawng lote chu June 7, 2016 ral hmain MSB-ah inhriattir leh a ngaih thu an tarlang.

MSB-a an inhriattir tawhte 6,900-te bank account-ah MSB-in scholarship pawisa thun tum mah se, application form-a hming an ziah dan leh bank account-a hming inziak a inan loh vang te, bank account chu small account anga an hawn vang te, account thi tawh eng emaw zat a awm vangtein sum dah luh theih lohna a awm nual niin an sawi.

Scholarship la dawng lo zirlaite chu an la dawn loh chhan leh dilna application ziahna te, application-a bank account an ziah lana account update (February-May) copy-te nen MSB-a inhriattir turin an ngen a; account thi tawh tih nun nan update hmain account-ah Rs. 100 emaw tal thun hmasa turin an chah bawk.

Aizawl khaw chhung college-a zir-laite chu an college SU hruaitute hnenah thehlut mai turin an chah a; SU hruaitute'n MSB lamah an thehlut mai dawn niin an sawi. Aizawla higher secondary school zirlaite tan erawh chuan MSB-ah thehluh a ngai thung.