Mi pahnih thiin chhar

Nimin zing dar 4 rîk hma khan Lalbuansanga (34), Zanlawn khua chu Kawnpui Bangla Venga NH-54 sirah thia hmuh a ni a, motor-in a chìl vanga a thi nia hriat a ni. Thawhṭanni zan khan Bawngkawnah Tuiukthanga (28) s/o Chaluaia, Mangkheng, Myan-mar thia hmuh a ni bawk.

Thu dawn danin, Kawnpui Bangla Venga thingpui dawra châwl, hnam dang motor lian khalhtute chuan kawng sira mitthi ruang an hmuh avangin dawr neitute an hriattir hnuah Kawnpui police-te hriattir a ni a; Lalbuansanga ruang chu Kawnpui PHC-ah postmortem a nih hnuah nimin khan vui a ni. Lalbuansanga hi a chàwn dinglamah motor-in a chíl a, a chíltu hriat a la ni lo.

May 30, 2016 zan dar 7:30 vel khan Bawngkawn Venglaia Rozama in chhawng hnuai ber luahtu, Tuiukthanga (28) chu a in chhungah thia hmuh a ni a; Seling bul, Phaibâwka a farnuin a ruang a la a ni.