Sorkarin sikul 65 a chhûn fin tawh Kum li chhungin sikul paruk a titawp

Mizoram sorkar chuan, kum 2008 aṭanga sikul chhûn fin (amalgamation) a kalpui hnuah kumin May 5 thleng khan Mizorama primary school leh middle school 65-te chu sikul 32-ah a siam tawh. Kum 2012-2015 inkarah sikul tihtàwp paruk a awm.

School Education Directorate aṭanga thu dawn danin, sikul chhûn fin 31 zinga 30 chu primary school a ni a, pakhat dang chu middle school a ni.

District hrang hranga Sikul chhûn fin tawh zat chu - Aizawl district-ah pathum, Kolasib leh Mamit district-ah pali ve ve, Champhai district-ah pariat, Serchhip district leh Lunglei district-ah paruk ve ve a ni.

Sikul chhûn finte hi sikul pahnih, hmun khata chhûn fin an ni tlangpui a; Aizawl khawpuiah sikul pathum hmun khata chhûn fin a awm a, chu chu Venghluia MICE, Tuikuala RM High School leh Tuikual P/S-II te RM H/S campus-a chhûn fin a ni.

Hetih lai hian, Serchhip dis-trict-a Bungtlang P/S-III leh P/S-IV te Bungtlang P/S-III ah chhûn fin tura tih a ni a, mahse harsatna a awm avangin kaltlangpui a ni lo.

Bungtlang P/S-III leh P/S-IV te hi July 24, 2015 khan sorkarin a chhûn fin a; mahse, P/S-IV a lut zirlai nu leh pate chuan duh loin, an fate chu P/S-III a sikul kái lo turin an ti a; P/S-IV zirlaite chu thla hnih dáwn sikul an kai lo. Harsatna a awm avang hian sorkar chuan school amalgamation order chu September 8, 2015-ah a sût.

Mizoram sorkar chuan kum 2012 aṭanga June 19, 2015 inkarah khan sikul paruk a titàwp a; chungte chu - Hnahthial P/S-II, Serchhip Sailam P/S, Champhai M/S, Champhai Kahrawt M/S-V, SM P/S, Champhai leh Thenzawl P/S-IV te a ni. New Champhai P/S leh M/S-te chu chhûn finin, comprehensive school-ah a siam.

School Education department chuan March 16, 2016 khan school amalgamation atana kaihhruaina a tichhuak. Norms for Amalgamation-a a inziah danin, sorkar sikul leh sorkar
ṭanpuina dawng sikul, P/S-a zirlai 25 nei tling lo leh M/S-a zirlai 35 nei tling lote chu sikul dang nen chhûn fin theih a ni a; chutih rualin, khua/veng chhunga km. 1 huam chhungah P/S pakhat leh km. 3 huam chhungah M/S pakhat a awm ngei tur a ni thung.

Vanglaini palai zawhna chhangin parliamentary secre-tary (School Education) Joseph Lalhimpuia chuan, school amalgamation tih dawnah harsatna tênau 5% vel a awm mai thei niin a sawi a; "Ruling party, MLA leh khawtlang hruaitute zingah sikul tihtawp ui an awm ṭhin a. Mahse, quality education kan duh avangin kan ti zel a, sikul kan chhûn fin hian zirtirtu an indaih thei zawk a, a ṭha zawk. Tunah chuan V/C eng emaw zat aṭangin sikul chhûn fin tura dilna kan dawng a ni," a ti.

School Education deputy director Lalrambuatsaiha pawhin Vanglaini zawhna chhángin, sikul chhûn fin dawnah harsatna tênau a awm ṭhin a, hmin kim vek a harsat thu a sawi a, chutih rualin, chhûn fin hnuah erawh chuan harsatna lian a awm lo tih a sawi.

School amalgamation chu Education Reforms Commission-in a rawtte zinga pakhat a nih thu leh, kum 10 chhunga sikul hmasawn miah lo, zirlai pung miah lote an awm thu a sawi bawk.

Sikul chhûn fin tawh zat

Aizawl district 3

Kolasib district 4

Champhai district 8

Mamit district 4

Serchhip district 6

Lunglei district 6