Economic hmanga nationalism rûn a nih lohna atan kan inbuatsaih: Zoramthanga

MNF president Zoramthanga chuan, eco-nomic hmanga Mizo nationalism rûn zel a nih lohna atan an party chu an inbuatsaih a, ruahmanna ṭha tak an neih tawh thu a sawi.

Nimina Mizoram Uni-versity-a zirtirtu leh zirlaite leh Pachhunga University Col-lege-a zirlaite nen Sy-nod Conference Cen-tre-a an inkawmnaah Zoramthanga chuan, MNF leh India sorkar inremna avangin Mizoram chu páwn lam aṭanga rûn theih a ni lo tih a sawi a, "A politics zawng chuan páwn lam aṭanga min rawn rûn ngaihna a awm lo, inhungna ṭha tak kan nei. Chhung lam aṭanga kawng hawnsaktu an awm erawh chuan a buaithlak hle," a ti.

MNF President chuan, Congress party chu Mizoramah a tìrah chuan inthlahrung dêkin an lut a, tunah chuan inthlahrunna nei loin an awm tawh niin a sawi a; "Congress chuan economic hmangin Mizo nationalism an rún a, nationalism-a ruh tak takte pawh sum leh paia an harsat miau avangin thlêmna an do zo ṭhin lo," tiin, economics hmanga inrûnna chu do harsa tak leh hneh har tak a nih thu a sawi.

MNF party chu economic hmanga inrûnna lak ata tâl chhuak turin a inbuatsaih tih sawiin Zoramthanga chuan, "Economic-a tihchhiatna lakah kulbíng siam a ngai. Mizoram hian ram ṭha tak, sik leh sa ṭha tak leh mihring ṭha tak tak an awm a, chu'ng mite chu ei leh bara an intodelh a, economic hmanga rûn tum an nih pawha an do zawh theihna turin ruahmanna kan siam a ni," a ti.

Zoramthanga chuan, Mizo hnam tlemtê chu economic exploitation laka invên loh chuan dam khawchhuah loh a hlauhawm tih sawiin, "Sorkarna kan chan chuan kan rama kan ro neih hmangin kan intodelh dawn. Mi puihna nghak ngawt tur kan ni lo," a ti a; privatisation, mechanisation leh large scale production an kalpui tur thu a sawi.

MNF President chuan nationalism chungchang sawifiahin, "Nationalism hi hnam dang huat ngawt a ni lo a, hnam dangte nena inngeih taka awm hi a tum a ni. Pathianin hnama min dinna vawng ṭha a, din khawchhuah ngawt tum lo a, malsawmna min pekte hâi chhuah a, min siamtu chawimawi hi nationalism chu a ni," a ti.

Inkawmhonaah hian zirlai leh zirtirtute'n zawh-na an neihte chu Zoram-thanga hian a chháng a; Mizoram kal zel tura thil pawimawh hrang hrangte an sawiho bawk.