Mahni hnam ngaihsanna hre lo chuan An zahawmna an paih bo nghal: Zira

Minister R Lalzirliana chuan, zirlai ṭhenkhat, state danga lehkha zira awm zingah mahni hnam ngaihsan nacháng hre lo an awm tih sawiin, chu'ng mite chuan an zahawmna an paihbo nghal tih a sawi.

Durtlang Higher Secondary School-in an sikul aṭanga HSSLC Examination 2016-a ti ṭhate chawimawina hun nimina an buatsaihah thu sawiin R Lalzirliana chuan, "Zirna ṭha zawk ûm a, phai leh hmun dang pantu zingah mahni hnam ngaihsan nacháng hre lo te, Zo nun ze mawi theihnghilh tate an awm
ṭhin hi a pawi hle. Kan hnam ze mawi - tlawmngaihna leh aia upate zahna kan paihbo rual rualin kan zahawmna kan paihbo nghal a ni," a ti.

Home Minister chuan, hmasawnna kawng hawia India ramin ṭhenawm ramte nen insumdawn tawnna lian zawk siam tura kawng hrang hranga nasa taka hma a lak mek thu sawiin, "Hmasawnna lo thleng turah hian Mizoramin dinhmun pawimawh tak a chang a ni. Myanmar leh khawchhak ram dangte tan India ram luhka pawimawh kan nih dawn avangin heng hmalaknain a ken tel hmasawnna hi a tak ramah a chang chho zel dawn," a ti a; Mizo ṭhalaite chu hmasawnna lo thleng tur atan inpuahchah tura a duh thu a sawi.

Durtlang HSS aṭang hian kumin HSSLC-ah zirlai 80 an exam a; distinc-tion-ah pakhat, first division-ah 13, second division-ah 14 leh third division-ah 45 an pass a ni.