Naupang laka dan loa chêtna tibo tura thawhpuiah Mizo mipui sáwm

Nimin June 12 kha World Day Against Child Labour a ni a, he ni pual hian Mizoram State Commission for Protection of Child Rights (MSCPCR) hotute chuan Aizawl Press Club-ah thu­thar thehdarhtute an kâwm. Nau­pangte'n an dikna chanvo an chan a, an laka dan loa chêtnate a bo theih nan thawhpuiah Mizo mipui an sáwm.

MSCPCR chairperson Dr C Lalsangzuala chuan, International Labour Organisation (ILO)-in khawvelah dik lo taka naupang chhawr a bo theih nan leh ram hrang hrangte an ṭan tlàn theih nan June 12 chu World Day Against Child Labour-ah a puang tih a sawi a, "Kumina World Day Against Child Labour thupui chu 'Let's act on our commitments: End child labour,' tih a ni a, thûk zawk leh nasa zawka dik lo taka naupang chhawr tihbo a nih theih nan hma la turin min phût a ni," a ti.

'Dan loa naupang chhawr' tih chuan naupangin a theih ang ang hna a lo thawh vete a huam vek lo tih sawiin Lalsangzuala chuan, "Danin a phal chin leh naupang taksain a zawh tâwk piah lama hna thawk tura chhawr te, hursualna kaihhnawih leh ruihhlo tawlhnaa naupang inhnamhnawihtirte hi naupang chhawr chungchanga kan do tlàn tur chu a ni," a ti a; ILO-in 'child labour' a tih chu - naupang nihphung hlohtir thei te, an theihna leh zahawmna hlohtirtu te, taksa leh rilru ṭhanna dâl thei te, zirna tibahlah theite a nih thu a sawi.

MSCPCR hotute chuan, Mizoramah child labour case record a la awm loh rualin, dik lo taka naupang chhawr hmuh tur a awm fo thu an sawi a, "Child labour case record a awm lo hi dik lo taka naupang chhawrah kan fihlim tihna ni loin, mipuite'n kan la ngaihven tâwk lohzia tilangtu a ni zawk. MSCPCR team-in kan enfiaha kan zir chian tawhnaah quarry leh hna hlauh­awm ṭhenkhatah kumtlinglo chhawr an awm nual," an ti a; kumin June thla chhung atan Aizawl leh a chhehvel an endik mek tih an sawi bawk.