HFW dept.-in document lem hmanga dentist hna thawk lakah hmalak a tum

Tun hnaia document lem hmanga ha doctor (dentist) hna a thawk tih hriat chhuah Christina Lalṭhazuali d/o Ngurhmingthangi, Dinthar, Aizawl chungchang chu Health & Family Welfare department-in ngawihbopui a tum lo a, hmalak ngei a tum.

Vanglaini zawhna chhangin HFW secretary Esther Lal Ruatkimi chuan, document lem hmanga dentist hna thawktu chungchang chu department hotute'n an sawiho tawh thu a sawi a, "Hmalak dan tur ruahmanna kan nei tawh. Kan minister Aizawlah a awm rih lo a, a rawn haw veleh a hoin thutlukna kan siam ang," a ti.

Health Secretary chuan, document lem hmanga dentist hna thawh chu ngawihbopui chia an ngaih loh thu sawiin, "Thil serious tak a ni a, keini chuan hmalak ngei ṭul kan ti," a ti a, engtin emaw tak hma an lak ngei a rin thu a sawi.

Christina Lalṭhazuali hi February 2023 khan National Health Mission (NHM) hnuaia thawk turin mi dangte rualin lak a ni a, document lem a hmang tih hriat a nih hnuah June 5, 2024 khan NHM hotute hnenah bànna a thehlut a ni.

Christina Lalṭhazuali chungchangah hian ZPM, Tuirial Constituency chuan thuchhuah siamin, Tuirial bialtu MLA K Laldawngliana farnu fa a nih thu an tarlang a, "Mipui nunna leh hriselna nghawng thei Tuirial bial chhunga dah a ni hi bial mipui min zah lohna leh ngaihthahna lian tak niin kan ngai," an ti.

ZPM Tuirial Constituency tarlan danin, Christina Lalṭhazuali hi July 10, 2023 khan Thenzawl damdawi-in aṭangin Kawnpui damdawi-inah thawk turin sawn a ni a, a zawm hma July 17, 2023 khan Lungdai damdawi-ina thawk turin sawn leh nghal ni mah se, mipui leh khawtlang hruaitute nawrna avangin Lungdaiah hian a insawn lo.

Kawnpui Joint VC pawhin thuchhuah siamin, document lem hmanga dentist hna thawk tih hriat chhuah tâk an khaw damdawi-ina thawk lai a ni chu pawi an tih thu an tarlang a, "Sorkar leh thuneitute pawhin document lem hmanga hna lak a nihnaah hian chhui zui ngai leh inhnamhnawih an awm chuan dan angin hma la ngei se kan duh," an ti a; Kawnpui CHC-a dental surgeon post ruak hnawh­khahsak leh thuai turin sorkar an ngen bawk.