MLA leh corporator fund ṭangkawpin hmasawnna hna thawh a ni dawn

Aizawl East-II bialtu MLA B Lalchhanzova fund leh AMC Ward-VIII corporator Christina Roluahpuii Sailo fund ṭangkawpin Ward-VIII chhungah hmasawnna hna thawh tum a ni a; hna thawhna atan B Lalchhanzova chuan nimin khan Christina Roluahpuii hnenah Rs 2,00,000 a hlan.

B Lalchhanzova chuan, a MLA fund chu hmun danga sum awmte nen a theih ang anga kai kawpin hman an tum thu a sawi a, "Kum 2023-a MLA thlan tharte khan fund cheng nuai 37 kan rochun a, chuta ṭanga Rs 2,00,000 chu Ward-VIII Corporator-in ward committee kaltlanga hmasawnna hna a thawhna atan ka hlan a ni," a ti.

Christina Roluahpuii'n hna a thawk ṭhaa a hriat thu sawiin Lalchhanzova chuan, "Chîk takin zir chiang se mark hmu sang pawl tak a niin ka ring. A hnathawh dan a langtlang hlein ka hria," a ti a; MLA leh corporator inkarah thawhhona ṭha awm zel se a duh thu a sawi.

Christina Roluahpuii chuan, Ward-VIII Committee-ah veng pathuma political party aiawhte leh prominent citizen-te an awm thu a sawi a, "Party leh veng bil sawi loin ward hmasawnna kan ngaihtuah ṭhin a, ward fund a bo a bâng awm loin a hmanna tur kan ngaihtuah ṭhin. Kan ward hmasawnna atan theihtawpin kan ṭangho ve ṭhin a ni. Tuna pawisa kan dawn pawh dik takin kan hmang ang," a ti. Ward Committee-te'n hnathawh a ṭhat leh ṭhat loh an vil zui ṭhin thu a sawi bawk.

Aizawl East-II MLA-in Rs 2,00,000 a pek bakah hian Ward-VIII Corporator hian a fund a thawh belh dawn a ni.