Ramhlun Venglai-in June thla chhung Commerce & Industries hun an pe

Ramhlun Venglai Hall Demand Committee chuan Commerce & Industries (CI) Director hnenah nimin khan lehkha thawnin, an veng hall hmun atana sorkarin CI department ram a pek tawh chu thla 9 hnuah pawh chinfel a la nih loh avanga an lungawi loh thu an hrilh. June thla chhunga chinfel a nih loh chuan District Industries office pisa kai turte an dan dawn thu an tarlang.

Committee tarlan danin, June 11, Thawhlehni zan khan vantlang inkhawm an ko a, veng mipui kal khawm chuan October 5, 2023-a Mizoram sorkarin hall sakna tur hmun a peka hmalakna la awm lo chungchang an sawiho a, resolution pathum an siam.

RAMHLUN VENGLAI RESOLUTION

1. Mizoram sorkarin Ramhlun Venglai hall sakna tur hmun min pek (vide Notification No. D.11028/1,2023-GAD dt. 5th October, 2023) hi a rang thei ang berin land lease siam fel ni rawh se.

2. June 30, 2024 hmain Commerce & Industrice department nen agreement siam fel ngei ni rawh se. Hemi hun chhunga tihfel a nih loh chuan July 1, 2024 aṭangin DIC staff-te pisa kal tur kan dang ang.

3. Kan hmalakna hi a la hlawhtling lo a nih chuan sorkarin ram min pek chhungah hian mipuiin a ṭul angin hma kan la ang.