Civil Hospital Aizawla nau neihna hmun thuam ṭhat Chief Minister-in a hawng

Civil Hospital, Aizawla nau neihna hmun, Labour Room leh Maternity Ward siam thar chu nimin khan chief minister Lalduhoma'n a hmang. Ward thar siam nan hian Rogi Kalyan Samiti (RKS) sum Rs 95,40,000 hman a ni.

Maternity Ward leh Labour Room thawm ṭhatah hian High Dependency Unit (HDU) tihlena tihchangtlun a ni a; post natal ward leh ante natal ward zauh a ni. Hmanraw hrang hrang tihchangtlun a ni a, inthiarna (toilet) pasarih siam belh a nih bakah, thil dangte thuam ṭhat a ni bawk.

Chief Minister chuan, nausen kum khat hnuai lam thi zat tehna, infant mortality rate (IMR) chu ram hmasawnna thlen chin tehna pawimawh a nih thu leh UN pawhin Millennium Development Goals-ah tehna pakhatah a telh thu a sawi a, "IMR hniam ram chu ram him, chenna atana ram ralmuanga ngaih a ni," a ti.

Lalduhoma chuan, IMR a hniam theih nan sorkar laipuiin nau hring turte chu damdawi-in emaw sub-centre-ah emaw nau nei ngei turin a duh tih a sawi a, "Nau piang hlim thihna te, nu nau chunga boral an tlem theih nante damdawi-inah ngei nau hring tura kan inzirtir rual hian damdawi-in leh nau neihna hmunhmate kan thuam ṭhat ve zel a ngai," a ti a; Aizawl Civil Hospital-a nau neihna hmunhmate tihchangtlun a ni chu lawmawm a tih thu a sawi.

Doctor leh damdawin lama thawkte chu an thiamna bakah, an ṭawngkam leh chezia thlenga damlote tana thlamuanpui tham an nih ṭhin avangin Chief Minister chuan anmahni pantu apiangte lawm taka an chhuah zel theih nana theihtawp chhuah turin a chah a ni.

Civil Hospital, Aizawl RKS Governing Body chairman Nazuk Kumar, Aizawl DC chuan, Maternity Ward leh Labour Room-a thawktute thawmrimzia leh taimakzia a hmuh thu a sawi a, "Hmunhma ṭha zawk leh hmanraw changtlung zawk an mamawh hle tih ka hriatpui a, RKS Governing Body chuan nau neihna lam a theih ang anga thuam ṭhat kan titlu ta a ni," a ti.

Civil Hospital Obs & Gynea HoD Dr Catherine Ngurbiakveli sawi danin, Civil Hospital-ah hian thla tin nau 320 an chhar ziah anga chhût a ni.