Bru hruai kîrna atan sorkar laipui sum Rs. 1,75,00,41,765 hman a ni tawh

Mizoram aṭanga tlân chhuak Bru, Tripura relief camp-a awmte Mizorama hruai kîrna atan sorkar laipui sum Rs. 1,75,00,41,765 (nuai 17500 chuang) hman a ni tawh. Sum sen zawng zawng chu kum 2015-a Bru hruai kîrna tura Road Map-4 siam anga pek a ni a, sumte chu sorkar laipuiin Mizoram sorkara a hlan hnuah a ṭul angin Mizoram sorkarin a lo hmang ve leh a ni.

October 1997 vel aṭanga Mizorama Bru mi eng emaw zatin Mizoram chhuahsana Tripura an pan hnuah, Tripura state chhunga hmun parukah camp neiin an awm khawm a; chu'ng mite chu Mizoramah hruai lêt tumin sorkar laipui leh Mizoram sorkarin ṭum eng emaw zat an buaipui tawh. Bru zinga eng emaw zat chu Mizoramah an lêt tawh laiin, a tam ber chu Tripura-ah an la awm thung.

RTI Act hmanga zawhna, "Bru/Tuikuk hruai kîrna atan Central-in engzat nge a tum?" tih zawhna Home department SPIO-in a chhan dan chuan, kum 2015-a Road Map-4 siam a nih hnuah Bru hruai kîr nan sorkar laipuia Ministry of Home Affairs (MHA) chuan Mizoram sorkar hnenah Rs. 1,75,00,41,765 a pe tawh. Kum 2019 chhunga Bru hruai kîrna tura sorkar hmalak dan zawhna Home department-in an chhan dan chuan, kum 2019-a Bru lâk lêtna tura kal chhuah hmasak ber chu October 3, 2019-ah niin, November 30, 2019-ah Mizorama haw turin Tripura an chhuahsan leh. Kum 2019 chhungin Tripura relief camp aṭangin Bru chhungkaw 289 chu Mizoramah an lêt a ni.

Kum 2019 chhunga Bru-te hruai kîrna atana sorkarin sum a sen zat pawh RTI Act hmangin zawh a ni a; Lunglei district, Mamit district leh Kolasib district-a DC Office-te'n an chàn tur ṭheuh zawhna chu Home department chuan a thawn vek tawh a, DC Office pathumin kum 2019 bika hruai kirna senso chi hrang hrang chhanna pawh dawn a ni tawh. (District pathumte chhanna bik hi hun dangah kimchang zawka la tarlan leh a ni ang.)