CYMA-ah chhawmdâwlna hlân

Kumin May thla tâwp lama Mizoram hmun hrang hranga chhiatna tuarte chhawmdawlna atana YMA, Manipur Group-in an huam chhunga vehbûr an khawna an hmuh Rs 4,07,630 chu Manipur Group YMA hruaitute chuan June 11, Thawhlehni khan Central YMA hnenah an hlân.

Manipur-a Zomi Youth Association leh Zomi Mother Association ten vehbûr an khawn tling khawm Rs 3,04,321 leh Zou Youth Association-in vehbûr an khawn aṭanga an hmuh Rs 1,97,847 pawh an aiawhin Manipur Group YMA hruaitute'n CYMA hnenah an hlan nghal bawk.

Cyclone Remal kaihhnawiha Mizorama chhiatna tuartute chhawmdawlna atan vêk hian Assam Regiment Centre, Shillong-a Zo hnahthlak sipai awmte chuan pawl an din, 'Mizo Insuihkhawm Pawl' tih hmingin CYMA-ah Rs 90,280 an hlân bawk a; MIP-ah hian Hmar, Zomi Inkuan, Kuki Chate Kiloikham-te an tel a ni.