Serchhip district-ah TB vei awm lohnaah khaw 11 puang

Serchhip District TB Committee chu an chairman David Lalthantluanga, bawrhsap hoin nimin khan an ṭhukhawm a; Serchhip district-a khaw 11 chu ngawr (TB) vei awm lohna khua, TB free village-ah an puang.

Serchhip district-a TB free village-te chu - Bâwktlang, Pilêr, Hmunṭha, Buangpui, Zote South, Sialhau, Khawbél, Neihloh, Thinglian, Vanchéngte leh Hmunzawlte a ni a, sorkar laipui tehfungah bronze medal an dawng. He'ng khuate hian sorkar laipui aṭangin lawmman an dawng dawn a ni.

Ṭhutkhawma tarlan danin, kum 2022-23 chhung khan Serchhip district-ah TB vei mi 53 hmuh chhuah a ni. Kuminah May 10 thleng khan TB vei mi 22 hmuh chhuah a ni tawh a, kum 2023 chhungin Programmatic Management of Drug-resistant (MDR) TB case pathum an nei bawk.

Serchhip Bawrhsap chuan, Serchhip district-in TB donaah hma an lak ṭhat thu leh sorkar laipuiin target a siamte an tihhlawntlin thu a sawi a, "Khawtlang mipui leh Health department hotute thawhhona ṭhatzia a lang. Hmalak hmasakna khaw 11-te an hlawhtlin ang bawk hian district chhung khaw dangah beihpui thlak zel a ni dawn a, TB awm lohna district kan nih ngei theihna turin khaw tinte'n ṭan kan lak a ngai," a ti.