Kumin January-May chhungin ruihhlo cheng vbc. 982.5 hû man

Chief secretary Dr Renu Sharma kaihhruaiin June 11, Thawhlehni khan State Narco-Coordination (NCORD) an ṭhukhawm. Kuminah January-May chhungin ruihhlo cheng vbc. 982.5 hû man a nih thu leh, ruihhlo man kaihhnawihah mi 581 man an ni tawh tih tarlan a ni.

Dr Renu Sharma chuan, dan kengkawhtu hrang hrangte inpekna leh thawhrimna fakawm a tih thu sawiin, "Thâ thlah loin ruihhlo tirêm turin bei zel ang che u," a ti a; district tina DC/SP-te chu thla tin district NCORD meeting nei turin a chah.

DGP Anil Shukla pawhin thu sawiin, ruihhlo donaah NDPS Act hnuaia dan leh inkaihhruainate ngaih pawimawh a ṭul thu a sawi a, "Ruihhlo kaihhnawih thubuai chhuina leh ruihhlo donaah dan kengkawhtu hrang hrangte'n thawhhona ṭha kan neih a pawimawh," a ti.

Ṭhutkhawma tarlan danin, kumin January-May chhung khan Mizoramah ruihhlo cheng vbc. 982.5 hu man a ni a; ruihhlo man kaihhnawihah hian thubuai 418 ziah luh a ni tawh a, mi 581 man an ni tawh.

Narco-Coordination hi Apex NCORD, Executive NCORD, State NCORD leh District NCORD hmangin kalpui mek a ni a; Ministry of Home Affairs duh dana hmalakna niin, khawpui aṭanga hmun kilkhâwr ber thlenga ruihhlo donaa hmalakna a ni.