MSPMC-in Mamita hnathawhte an endik

Mizoram State Project Monitoring Committee (MSPMC) member-te chuan an vice chairman R Lalrinawma, IRS (Rtd) hoin nimin khan Pradhan Mantri Jan Vikas Karyakam aṭanga sum hmuh hanga Mamita Residential School leh District Sports Complex sak mekte a hmunah an endik.

Mamita Residential School chu Edufice Infraservices Pvt Ltd (New Delhi)-in an sa a, September 15, 2024-a zawh tura tih niin, bill 85.49% pek chhuah a ni tawh. Academic building, sikul building, auditorium, mipa leh hmeichhe hostel, quarters eng emaw zat, multipurpose hall leh thil dang dang awm tura ruahman a ni a; zirlai 70 leh thawktu 30 awm theihna tur a ni.

Residential School hian phûllem phah khelmual a keng tel a; phullem phah hna chu Decor India, Guwahati-in thawkin, August 31, 2024-ah zawh hman tur a ni a, bill 28.69% pek chhuah a ni tawh. Residential School leh a ken tel zawng zawng atana sum ruahman chu cheng nuai 3,286.34 a ni.

MSPMC Vice Chairman chuan, Residential School peih ṭêp tawh chu building sak dan ṭha viau mah se, a nih dan tur anga hmang lo a, a awm ṭâwl mai mai ang tih an hlauhthawn ber thu a sawi a; zirlai lâk dan tur leh enkawl zui dan turah ruahmanna a la awm lo chu pawi an tih thu an sawi bawk.

District Sports Complex chu contractor pathum - Junior Consultancy Services Tlangnuam, Creative Minds Chanmari West leh T Thanzauva, Tlangnuam, Aizawl-te'n an thawk a; November 3, 2024-a siam zawh tur a ni. Sum ruahman chu nuai 4,496.48 a ni a, 35.38% pek chhuah a ni tawh.

Endiknaah hian Vice Chairman bakah, secretary Vanlalruata Sailo leh member dangte an tel a, Mizoram State Sports Council aṭangin engineer leh thawktu dangte'n an ṭawiawm. Mamit Hmarveng leh Luangpawl khawtlang hruaitute an tel bawk. Nimin vêk khan Mamit leh Bawngva khuaa hmasawnna hna thawh mek eng emaw zat an endik bawk a ni.