Apex Bank-in nuai 4,246.47 an hlêp

Mizoram Cooperative Apex Bank (MCAB) chuan nimin khan Vanapa Hall-ah Annual General Assembly vawi 29-na an hmang a, Cooperation minister PC Vanlalruata'n a hmanpui. MCAB hian financial year 2023-24 chhungin cheng nuai 4,246.47 an hlêp tih an tarlang.

Cooperation Minister chuan, cooperative bank chu state sorkarin a rinráwl ber a nih ṭhin thu sawiin, "Mizoram sorkarin a ngai pawimawh a, sorkar sum che vel atan Apex Bank hmang ṭangkai tura inhrilh ṭhin a ni," a ti a; mahni kutke ngeia ding thei turin rilru leh ngaihtuahna siam a pawimawh thu a sawi.

MCAB inkhawmpuiah hian cooperative society thawk ṭhate leh branch thawk ṭhate hnenah lawmman sem a ni.

MCAB report-a a lan danin, kum 2023-24 chhung khan MCAB hian cheng nuai 4,246.47 an hlêp a; kum 2022-23 chhunga an hlêp cheng nuai 3,965.69 aiin nuai 280.78 (7.08%)-in a tam zawk. MCAB-ah hian thawktu mi 165 an awm mek a, branch 27 leh ATM booth (mobile ATM telin) 34 an nei a ni.