KHAWTHLIR

NIT-in thisen pe

National Institute of Technology, Mizoram chuan kumina World Blood Donor Day (June 14) pualin nimin khan NIT Health Care Centre-ah thisen pek an huaihawt. Civil Hospital, Aizawl tan thisen unit 31 an pe a, petute mipa 28 leh hmeichhia pathum an ni.

Village Day buatsaih

Agriculture department chuan nimin khan Bilkhawthlir bial chhunga loneitute'n an mamawh an lama an sawi theih nan Saiphai community hall-ah Department Village Day an buatsaih a; Saiphai, North Chawnpui, Saipum, Saihapui-V leh Phainuam khuaa loneitu eng emaw zatin an mamawhte an lam a ni.

Mission Summit

Chief minister Lalduhoma chuan June 11, Thawhlehni zan khan Vanapa Hall-ah India Missions Association Global Mission Summit 2024 a hawng. CM chuan, "Chawlh hahdam in duh cháng te, boruak ralmuang tak hnuaia thâwk han lâk in châk changte'n rawn zin ṭhin u la, Mizoram hian chanchin ṭha hriltute hi kan zahin kan ngaisang a ni," a ti.

NECTAR office

North East Centre for Technology Application and Reach (NECTAR) Mizoram Liaison Office chu nimin khan Planning and Programme Implementation secretary Vanlaldina Fanai-in Directorate of Science and Technology building, MINECO-ah a hawng. NECTAR hi India hmarchhaka science leh technology hmasawnna buaipuitu leh mipuiin an chhawr ṭangkai theihna tura hma latu bulpui ber a ni a, kum 2012 khan sorkar laipuia Department of Science and Technology hnuaiah din a ni.

Inzirna buatsaih

Mizoram sorkara Mizoram Startup Mission leh North Vanlaiphai Village Council chuan nimin khan N Vanlaiphai Tourist Lodge-ah kutkawih eizawnna buaipuitute tan inzirna an buatsaih a; N Vanlaiphaia ei leh in lam siama sumdawngte leh higher secondary school zirlaite an tel. N Vanlaiphaiah hian food processing lam buaipui eng emaw zat an awm a; sunhlu tui, sunhlu candy, serthlum tui, khawmhma candy, mai jam, dragon fruit juice-te an siam a ni.