Mizoram Sports Conclave ṭan: Olympics 2036-a infiammi tirh tumna hi Sorkar policy atan hman tum a ni - CM

Sports & Youth Services (SYS) department buatsaih Mizoram Sports Conclave - Preparing Mizoram for Olympics Games, 2036 chu nimin khan Baptist Centre, Falkland Vengah chief minister Lalduhoma'n a hawng. CM chuan, Olympics 2036-ah Mizoram aṭanga infiammi tirh tumna chu Mizoram sorkar­in policy atan neih a tum thu a sawi.

Chief Minister chuan, SYS department-in kum 2036 Olympics-ah Mizoram aṭanga infiammi tirh tumin theihtawp a chhuah mek tih sawiin, "Sports department chuan policy-ah neiin hma a la. Department pakhat mai ni lo, state sorkarin policy atana a neih theihna turin hmalak a ni," a ti.

Mizoramah infiamnaa theihna (talent) nei ṭha tak tak an tam tih sawiin Lalduhoma chuan, "Kan infiammite hi dinhmun sang zawka an awm theih dan tur ngaihtuah a ngai, Olym­pics kan thlenpui theihna atan hmalak a ni dawn," a ti a, non residential coaching kum­tluana kalpui tum a nih thu a sawi.

Chief Minister chuan, infiamna lama hmasawn tak tak tur chuan infrastructure lamah hmasawn a ngai tih sawiin, "Sum lamah kan dinhmun ṭha lo mah se, theihtawp kan chhuah dawn. Kan ṭan rual phawt chuan Mizoram leh India ram hi infiamna lamah kan chawisang thei ngei ang," a ti.

SYS minister Lalnghinglova Hmar pawhin thu sawiin, "Prime Minister chuan Olympics 2036 thlen tum a nih thu a puang tawh. Olympics hi kan thleng thei ngei ang, mahse, infiammi kan chher chhuah loh chuan ram dang infiammite inelna mai kan thleng dawn a ni," a ti a; Olympics-a Mizoram leh India infiammi a tam thei ang ber an tel theihna tura inbuatsaihna atan Conclave chu buatsaih a nih thu a sawi.

Mizoram hmun hrang hrangah infiamna lama theihna nei ṭha zawn chhuah an ngai pawimawh hmasa dawn tih sawiin Sports Minister chuan, "He programme hi public private partnership hmanga kalpui tur a ni. Chuta ṭanga kan thlan chhuahte chu coaching pek char char an ni ang," a ti.

Mizoram Sports Conclave hawnnaah hian Assam Sports minister Nandita Garlosa leh Meghalaya Sports minister Shakliar Warjri te pawhin thu an sawi a; kal khawmte'n zawhna an neihte an chháng.

Mizorama sport association hrang hrang hruaitute bakah, India rama company leh media-a thawk, infiamna lam buaipuitute an tel a; vawiinah chhunzawma zawh a ni ang.