Mizorama FCI kudam parukah buhfai qtl. 1,75,590 a awm mek

Food Corporation of India (FCI) State Consultative Com­mittee chairperson K Vanlalvena, Rajya Sabha MP chuan nimin khan Hotel Regency-ah thuthar thehdarhtute a kâwm a; Mizorama FCI kudam parukah buhfai quintal 1,75,590 a awm mek thu a sawi.

K Vanlalvena chuan, FCI kudam paruk - Aizawl, Lunglei, Kolasib, Lawngtlai, Bairabi leh Bualpuiahte nimin zing dinhmun angin buhfai quintal 1,75,590 a awm mek thu a sawi a, "June-August atan Mizoram sorkarin FCI aṭangin buhfai metric ton 15,261.537 a lei tawh," a ti.

FCI-in Sairanga buhfai qtl. 1,00,000 lenna tur kudam an sak mek chu Environment, Forest & Climate Change department aṭanga complaint a luh avangin an chawlh (stay) mek thu sawiin MP chuan, "Kudam hi 60% vel kan sa tawh a, mahse, reverine reserved forest chhung a lo ni a, keini lamin kudam kan sak hma khan EFCC lamah phalna kan lo dil bik si lo a, chuvangin, kan chhunzawm thei rih lo," a ti a; Mizoram sorkarin hma a lakpui mek thu leh a fel thuai a beisei thu a sawi.

K Vanlalvena chuan, kum 2022 khan Mizoram sorkar hnenah MINECO chhungah FCI Divisional Office hmun tur an dil thu sawiin, "Sorkar khan min pe mai dawn a maw kan ti a, mahse, kan tifel thei lo a, tunah hian kan dil thar leh. FCI Divisional Office hian mi in an luah a, FCI puala office building neih ve a ṭul kan ti. Hmun kan neih chuan Mizoram sorkarin in a sak a ngai dawn lo a, central aṭangin an rawn sa thei a ni," a ti.