Healthy Lunglei District Campaign hawng

Health & Family Welfare minister Lalrin­puii chuan June 12, Nilaini khan Lunglei Convention Centre-ah 'Healthy Lunglei District Campaign' a hawng a, a thlâwna inentirna buatsaih nghal a ni.

Healthy Lunglei District Campaign hawnna inkhawm hi Lunglei chief medical officer Dr LC Liana'n a kaihruai a; Health Minister chuan Healthy Lunglei District Programme tihlawhtling turin mi tin an pawimawh thu sawiin, "Mi tinte'n ei leh inah kan inthunun a ṭul bakah, taksa sâwizawi kan ngai pawimawh a ngai," a ti.

Inlawmna thu sawitu Lunglei DC Ramdinliani chuan, "He programme hi a hlawhtlin theihna turin âtchilh pawl awm a ngai a, department thawktute leh mipui pawhin theihtawp kan chhuah a ngai a ni," a ti a; Campaign chu Lunglei district mipui hrisel zawkna tura hmalakna a nih thu a sawi.

Healthy Lunglei District Campaign hi Lunglei district-ah kalpui nghal tur niin, nimina a hawnnaah hian a thlawna inentirna buatsaih nghal a ni a; Lunglei Civil Hospital, Christian Hospital, Assam Rilfes leh BSF-a doctor-te'n inentirte dinhmun an enfiah. August thla aṭangin Lunglei district-a khaw dangahte campaign kalpui zui a ni ang.

Campaign hawnnaah hian MLA pathum - Lunglei South bialtu Lalramliana Papuia, Thorang bialtu R Rohmingliana leh West Tuipui bialtu Prova Chakma te pawh an tel a; National Health Mission-a mission director Dr Eric Zomawia'n natna inkai chhâwn theih loh chungchang a sawi a ni.