CM-in Chief Minister's Award a hlân

Chief minister Lalduhoma chuan nimin khan Vanapa Hall-ah kumin HSLC leh HSSLC-a ti ṭha ber (topper)-te hnenah Chief Minister's Award a sem a, School Education minister Dr Vanlalthlana khualzahawm a ni.

CM's Award hi HSLC-a pakhatna Lalmoipuia Lawmzual, St. Paul's HSS te, HSSLC stream tina pakhatna ṭheuh Linden Lalremruatpuia, Oikos HSS (Arts), Lalramdina Ralte, St. Paul's HSS (Science) leh David Lalhminghlua, St. Paul's HSS (Commerce)-te hnenah hlan a ni a; lawmman hian Rs 50,000 leh thuchei a keng.

CM Lalduhoma chuan, HSLC leh HSSLC-a pakhatnate chu an taimâk vanga pakhatna ni thei an nih thu sawiin, "Talent nei ṭha mah ila kan taimâk loh chuan hnehtu kan ni thei ngai lo," a ti.

Chief Minister chuan, HSLC leh HSSLC-a hlawhtling ve rih lote a hre reng tih sawiin, "Beidawng rêng rêng lo turin ka ngen. Vawi hnih khat hlawhchham hi beidawnpui tham chhiatna a ni ngai lo a, nasa zawka hlawhtling tura inbuatsaihna mai a ni," a ti a, zir chhunzawm zel turin a chah.

Khualzahawm Dr Vanlal­thlana chuan, zirlai sing chuang zinga a ti ṭha berte chu an ropui thu sawiin, "In hlawhtlinna phênah hian thawhrimna leh tumruhna a hmuh theih a, chu chu a entawntlak a, a ngaihsanawm a ni," a ti.

HSLC leh HSSLC-a pakhatnate hnena CM's Award hlan hi School Education department buatsaih niin, kumin hi kum 11-na a ni a; zirna ṭha zawk a awm theihna tura sorkar ruahmanna niin, sum senso pawh budget-ah dah lâwk a ni.