Thiamthil zir bul ṭanna CM-in a hmanpui

Mizoram KVI Board chuan June 12, Nilaini khan Multi Disciplinary Training Centre (MDTC), Zemabawka course hrang hrang zir mek mi 126-te bul ṭanna, induction programme an buatsaih a, chief minister Lalduhoma'n a hmanpui.

Chief Minister chuan, ṭhalai lehkhathiam an pung zel a, sorkar hnaah an lut vek thei lo tih sawiin, "Eizawnna dang dap a ngai a, ram pawna inhlawh emaw, mahni rama mahni kutkawiha hmalak kan tum a nih pawhin skill kan neih a ngai," a ti a; thiamna eng emaw neih theihna tura Mizoram KVI-in inzirna a buatsaih ṭhin chu ṭha a tih thu a sawi.

MDTC-a inzir turte chu hlawhtling ngei tura ṭang tura fuihin Lalduhoma chuan, "Ṭhalai theihna nei, mahni kea din tuma bei ngam entreprenuer-te chu kan sorkar hian Bana Kaih Policy hmangin kan thawhpui dawn a ni," a ti.

MDTC hi kum 1987-ah din niin thawktu mi 53 an awm a, KVI Commission aṭangin sum an dawng ṭhin. KVIC aṭangin thil chi 11-ah leh IIT, Gauhati nena thawh dunna hnuaiah PMKVY aṭangin thil chi thumah training an kalpui. Inzir mek mi mi 126 an awm a, mi 4,280 an inzir chhuak tawh bawk.