Congress hi kan tho leh thei - Thanzara

Mizoram Pradesh Congress Committee (MPCC) president Lal Thanzara chuan nimin khan Aizawl District Congress Committee (ADCC) hruaitu ruat tharte ṭhutkhawm hmasa ber a hmanpui a, "Tih tak zeta hma kan lak chuan Congress hi kan tho leh thei a ni," a ti.

MPCC President chuan, "Mite'n inthlan lehah chuan Congress an sorkar leh mai ang an ti ṭhin, kan ṭan rual chuan kan chak leh thei a ni. Thawhhona boruak a ṭhat phawt chuan hlawhtlinna kan chang thei," a ti a; hotu hrang hrangte an inthawhpui ṭhat a ṭul thu a sawi.

Congress sorkar hnathawh tawhte chu mi ṭhenkhatin an hre lo nia sawiin Lal Thanzara chuan, "Hmasawnna hnathawh ropui tak takte hi Congress sorkar hnathawh a ni a, kan hun kal tawha kan hnathawh hi a ropui. NLUP pawh a chhawrtu tam tak an awm. Remna leh muanna lo thlenna tura Congress party hnathawhte kha a hlu em em a, rambuai la hre pha lo chuan an hrethiam lo a ni," a ti.

Ṭhutkhawm hi ADCC president Lalhming­thanga Pachuau-in a kaihruai a, MPCC senior vice president Lalnunmawia Chuaungo leh treasurer Dr Lalmalsawma Nghaka te pawhin thu an sawi a ni.