HIV/AIDS donaa hmalakna tur sawiho

Executive Committee of Mizoram State AIDS Control Society (MSACS) chu nimin khan Hospital & Medical Education directorate conference room-ah Health secretary Esther Lalruatkimi kaihhruaiin an ṭhukhawm a; MSACS hnuaia HIV/AIDS vênna lama hmalakna, Targetted Intervention (TI) hmachhawpte leh sum mamawh turte an sawiho.

Ṭhutkhawmah hian Health & Family Welfare hotu lu te, MSACS Project Director leh hotu dangte bakah, a kaihhnawih sorkar department aiawhte leh MJA aiawhte an tel. TI project 60, Link Worker Scheme project pariat, OST center 61 leh satellite OST center-te enkawlna tur sum pe chhuak tura dilna te, damdawi/ruihhloa inchiu ṭhinte enkawlna tur leh an hman tur hriau (syringe) tam tham tak leina tur sum dilnate leh pawimawh dangte an ngaihtuah a ni.

Esther Lalruatkimi chuan, HFW secretary a nih chhungin hlawhtlinna eng emaw zat an neih thu sawiin, department-a thawktute nen thawhhona ṭha tak an neih vang a nih thu leh a lawm tak zet thu a sawi.