Agriculture & Farmers Welfare-in Horticulture hmalaknate enfiah mek

Sorkar laipuia Ministry of Agriculture & Farmers Welfare team chuan June 11, 2024 aṭang khan Mizoram Horticulture department hmalaknate an enfiah mek a, vawiinah an zo dawn; nimin khan Aijal Club-ah Horticulture minister Prof. Lalnilawma hoin department hotute nen an inkâwm.

Prof. Lalnilawma chuan, central team-te'n an tawnhriat aṭangin Mizoram mil leh mamawh an zir chhuah ngei a rin thu sawiin, "Department-in scheme a kalpui mek bakah hian hmasawn lehzual nan puih kan ngaihna apiangah min pui a, hmasawnna tura ṭanho a ṭul. Thlai chìnah kan ṭhat tawh viau laiin a sawngbawlna lamah te, ram pawna thawn chhuah leh rei zawk dahṭha thei tura thiamnate kan mamawh," a ti.

Ministry of Agriculture additional commissioner Dr Naveen Kumar Patle chuan, Mizorama Horticulture department hmalakna a hmun ngeia an hmu thei chu a lawm thu a sawi a; Mizoram thlai chíngtute hmalakna leh hmasawn zel theihna tur atan rawtnate siamin theihtawpa hmalakpui zel an inhuam thu a sawi bawk.