KHAWTHLIR

Thisen pe

Boston Higher Secondary School, Mission Veng chuan an sikul din champha pualin nimin khan an sikulah thisen pek rûnpui an huaihawt a; Civil Hospital, Aizawl tan thisen unit 68 an pe a, petute mipa 54 leh hmeichhia 14 an ni.

Tanpuina hlan

Myanmar Chin state-a media, Vaurawng Zuunthil-te chuan tun hnaia Mizorama thli leh ruah vanga chhiat tâwkte ṭanpuina tura an khawn khawm Rs 10,00,000 chu nimin khan Central YMA hnenah an hlan. Vaurawng Zuunthil hian June 3-6, 2024 chhung khan social media kaltlangin ṭanpuina an khawn a, chuta ṭanga sum an hmuhte chu CYMA hnenah an hlan a ni.

Minister-in tlawh

AH&Vety minister C Lalsawivunga chuan nimin khan Khawzawla AH&Vety pisa leh Vety Hospital a tlawh a, thawktute leh khawtlang hruaitute nen an inkâwm. Khawzawla hun a hman zawhah Champhaia slaughter house (ran talhna), AH&Vety office leh Vety Hospital-te a tlawh bawk.

Chetsualnaah thi

C Lalhmachhuana (40) s/o C Lalthangmawia (L), Khatla chu June 12, Nilaini zan dar 8:15 vel khan an vengah scooty-in a chesual a, damdawi-ina hruai a nih hnuah a hliam tuar loin zanlai dar 12:05-ah a thi.

ZOFISFED inkhawmpui

Mizoram Cooperative Fish Farming Marketing and Processing Federation Ltd. (ZOFISFED) chuan nimin khan IPR Auditorium-ah General Assembly vawi 20-na an hmang a, Fisheries minister Lalthansanga'n a hmanpui. Minister chuan, sorkar chuan project reng reng chu nakina zelah a hmantlak dawn em, a hman zui theih dawn em, sorkar tan phurrit a ni thei em tihte a ngai pawimawh tih a sawi. ZOFISFED hi kum 1998 khan din a ni a, a hnuaiah primary fishery society 43 a awm mek a ni

Lehkhabu tlangzarh

Thahleimawii (Amawii), Lawngtlai Bethel Veng lehkhabu ziah 'Chhimbal zungkaihna ramah' tih chu nimin khan Lawngtlai District MJA president Elvis Lalthangzuala'n a tlangzarh. Lehkhabu hi phek 148 a chhah, Rs 180 man a ni.