World Blood Donor Day hman a ni; Pawl hminga thisen pe tam ber NSS

Nimin June 14 kha thisen petute chawi­mawi­na ní, World Blood Donor Day (WBDD) a ni a, Mizoram hmun hrang hrangah hman a ni. Thisen pe ṭhate hnenah chawimawina hlan a ni a, Mizoram puma pawl hminga thisen pe ṭha ber chu National Service Scheme (NSS) an ni.

Aizawlah chuan MSACS leh Association for Voluntary Blood Donation (AVBD) huaihawtin Vanapa Hall-ah WBDD hman a ni a, Health minister Lalrinpuii khuallian a ni. Mizoram pum huapa pawl hminga thisen pe tamte leh Aizawl district bika pe tamte hnenah chawimawina hlan a ni a; NSS chuan state pumah thisen unit 4,900 an pe a, F Kapsanga Award hlan an ni. Thisen unit 4,726 petu Central KṬP leh unit 2,930 petu MṬKP-in an dawt.

Negative blood donor zinga chhinchhiah china vawi 10 aia tam thisen pe tawh mi pariat hnenah chawimawina hlan a ni bawk a; negative blood nei hi an tam lo a, negative blood nei zinga thisen mamawh an awm hun­ah thisen pe tura ngen/koh ṭhin an ni.

Health Minister chuan, thisen petute chu mi dangte nunna petu an nih thu sawiin, "In hlu a, kan ngaisang che u a, kan chawimawi che u. Thla thum danah thisen pek theih a ni a, birthday leh kan ni pawimawhahte thisen pek uar zel ila, a tam thei ang ber thisen pe turin rilru i siam thar zel ang u," a ti.

Ṭum khata thisen pek huk aiin pek zin a ṭangkai zawk tih sawiin Lalrinpuii chuan, "Thisen pek zin hi a ṭangkai zawk a, a hlu zawk a ni tih hriat a ni a, thisen petute leh pawl hrang hrangte insiamrem hret hret thei ila a duhawm hle a, a ṭul bawk," a ti a, thisen pe ṭhin pawlte chu vawi khatah tam tak pek aiin, pek zin tum turin a chah.

Health Minister chuan, ruihhlo tih vanga thisen pe tlak lo an tam ve tial tial tih sawiin, "Ruihhlo vangin pe thei loin mi tam tak an awm mek. Thisen pek hi mi dangte tana kan nun theihna hlu tak a ni a, thisen pe thei ngei turin ruihhlo laka fihlim a, nun dan hrisela nung turin ṭhalaite ka chah a ni," a ti.

Report petu MSACS project director Dr Lalthlengliani tarlan danin, financial year 2023-24 chhung khan Mizoramah thisen unit 35,619 pek a ni a, chu'ng zinga 32,493 chu a thlawna pek (voluntary donation) niin, 91.22% a tling.

WBDD Day hmannaah hian NHM mission director Dr Eric Zomawia'n inlawmna thu a sawi a, ṭum 90 thisen pe tawh RC Rokhum chuan thisen a pek ṭhin chungchanga a testimony a sawi. Thisen vawi 100 chuang dawng tawh mi pahnihin thu an sawi bawk.

World Health Organisation (WHO) chuan blood group ABO hmu chhuaktu Karl Landsteiner pian champha June 14 chu World Blood Donor Day-ah puangin, kum 2004 khan hman ṭan a ni a, Mizoramah chuan kum 2007-ah hman ṭan a ni. Kum tin thupui hrang hrang neia hman a ni a, kumina thupui chu '20 years of celebrating giving: Thank you, blood donors!' tih a ni.