Bawngkawn-Durtlang inkara filling station siam tuma hmalakna tihtawp a ṭul thu thlen

Bawngkawn leh Durtlang inkar kawng chhak lam laih chu June 13, Ningani khan sorkar hotute leh a kaihhnawih mi hrang hrangte'n an enfiah. Sorkar aṭanga endiknaa hotu chuan, lei laih leh filling station siam tumtute hmalakna reng reng tihtawp phawt a ṭul thu Aizawl District Disaster Management Authority (ADDMA) hnenah an thlen.

Bawngkawn Haflong chhaka lei laih leh filling station (petrol pump) siamna tura hmalakna kal mek enfiahnaah hian ADDMA aiawh te, Disaster Management and Rehabilitation department, Geology and Mining leh Aizawl Municipal Corporation aiawh te, Durtlang Leitan leh Bawngkawn LC aiawh te, Joint Action Committee on Durtlang Road, Centre for Environment & Social Justice leh BRTF aiawhte an tel a; lei laitute an tel bawk.

Bawngkawn-Durtlang kawng enfiahna report chu Aizawl DC office-a assistant commissioner leh zonal officer Dr Peter Malsawmtluanga chuan, nimin khan Aizawl DDMA Chairman hnenah a thehlut a, a hmuh dan leh rawtnate a tarlang.

Zonal Officer chuan, Bawngkawn-Durtlang kawnga filling station siamna tura lei laih leh hmalakna kal mek zawng zawng chu, engti zawng pawhin a rang thei ang bera tihtawp phawt a ṭul thu leh, mipui himna tura hmalak hmasak phawt a ṭul thu a tarlang a ni.­