College zirtirtu tura qualify lo mi 30-in College-ah zirtirtu hna an thawk mek

RTI Act tlawhchhana zawhna chhan a nih danin, tun dinhmunah Mizorama college-a zirtirtu casual/part time-a thawk zingah mi 30 chu college-a zirtir hna thawk tura danin a phût ang thiamna nei lo (unqualified) an ni.

Mizoram University Research Scholars’ Association (MURSA) hruaitute chuan June 13, Ningani khan Higher & Technical Education (HTE) minister Dr Vanlalthlana chu a pisaah an kâwm a; Mizorama college zirtirtu part time/casual leh contract-a thawk zingah University Grant Commission (UGC) minimum requirement nei lo tam tak an awm tih hrilhin, ṭha lo an tih thu leh Mizorama zirna in sanga zirna tihniamtu an nih thu an thlen.

MURSA hruaitute chuan, Mizorama college zawng zawngah zirtirtu qualify ngei dah a nih thuai theih nan hma la turin HTE Minister an ngen a, "Mizo ṭhalai zingah Ph.D bakah, National Eligibility Test (NET), State Level Eligibility Test (SLET) leh State Eligibility Test (SET) nei tam tak an awm tawh kara zirtirtu qualify lo lak a ni fo hi hah taka degree sang tak hlawh chhuaka zir Mizo ṭhalaite dika chanvo chhuhsakna a ni," an ti.

HTE Minister chuan, MURSA thu thlen chu lawmawm a tih thu sawiin, "Mimal tak pawha ka vei em em ṭhin a ni a, sorkar hmalakna kal mek a ni," a ti a; Mizoram sorkar enkawl college-ah zirtirtu qualify ngeite chhawr a nih theih nan theihtawpin hma an lak mek thu a sawi.

MURSA tarlan danin, UGC chuan university leh college-a zirtirtu atan hian minimum requirement a siam a; master degree-a 55% hmu chin, NET/SLET/SET paltlang an ni tur a ni a, Ph.D nei tan NET/SLET-ah ngai­hnathiam theih a ni.

RTI Act zawhna chhan­na an dawn danin, tunah hian Mizoram college zirtirtute casual/part-time zingah quali­fication ang tlin lo (unqualify) mi 30 an awm mek a, UGC minimum re­quire­ment pha si loa contract-a lak leh hlan kai mi pali an awm mek bawk.

Mizoram sorkar enkawl college zinga unqualified teacher nei tam ber chu Champhai College a ni a, mi pariat an awm.

Department mal bikah, arts-ah chuan economics-ah zirtirtu qualify lo tam berin, pathum an awm a; science stream-ah chuan BCA-ah zirtirtu qualify lo mi pasarih an awm a ni.