District-ah Blood Donor Day hmang

Nimin khan district ṭhenkhatah World Blood Donor Day (WBDD) hman a ni a, sorkar kum liam ta chhunga thisen pe ṭhate hnenah chawimawina hlan a ni.

Lungleiah chuan AVBD, Lunglei Branch buatsaihin Lunglei Nursing School auditorium-ah WBDD hman a ni a, Lunglei High Powered Committee vice chairman V Malsawmtluanga, MLA-in hmanpuiin thu a sawi a, Lunglei Civil Hospital blood bank officer Dr Vanlallawma Khiangte pawhin thu a sawi.

Kum 2023-24 chhunga Lunglei district chhunga pawl hminga thisen pe tamte hnenah chawimawina hlan a ni a; Lunglei district-a thisen pe tam ber nia hriat Lalhmingchhuanga Chhangte (vawi 58) hnenah chawimawina hlan a ni bawk.

Lawngtlaiah chuan Lawngtlai Bazar YLA Hall Committee Room-ah hman a ni a, Lawngtlai additional DC B Malsawmtluangi khuallian a ni. Lawngtlai district-a mimal thisen vawi 50 pe tling chin mi panga leh vawi 30 pe tling chin mi 10 hnenah chawimawina hlan a ni a; June 14, 2023 leh kumin June 14 inkara pawl leh kohhran anga thisen pete hnenah chawimawina hlan a ni bawk.

Champhaia chuan District Hospital-ah hman a ni a, chief medical officer Dr PC Lalhmingliana'n a hmanpui a; kum 2023-24 chhunga mimal leh pawl anga thisen pe tamte hnenah chawimawina hlan a ni.

LUNGLEIA THISEN PE ṬHATE

Rank Lawmman Dawngtu Pek zat

I. KOHHRAN HUANG

1-na PYD, Lunglei 526

2-na ṬKP, Bazar Bial 152

3-na Lunglawn Pastor Bial 123

II. INSTITUTION

1-na JB College 196

2-na HATIM 132

3-na Lunglei College 118

III. NGO BASE

1-na YMA Hostel, Bazar Veng 31

2-na Darzo Branch YMA 25

3-na Serkawn Branch YMA 5

IV. PAWL DANG

1-na LDF Cable Network 56

2-na HDFC Bank, Lunglei 26

3-na 20th Bn. BSF 29