YMA Day: Ṭanpui ngai ṭanpui turin inchah

Vawiin June 15 hi YMA Day a ni a, Mizoram pum bak­ah, state pawn lamahte lawm a ni dawn a, Central YMA hruaitute'n hmun hrang hrangah an hmanpui ang. CYMA president Lal­hma­chhuana chuan, YMA Day-ah hian ṭanpui ngai­te dap chhuaka ṭanpui turin member-te a chah.

YMA Day hi branch hrang hrangin an remchan angin an lawm dawn a, branch tam tak chuan tun kar tir lam aṭangin lawmna hun an hmang ṭan tawh. Branch tam tak chuan vawiin hian khua/veng chhung leh thlanmual tihfai hnatlang an nei dawn a, intihhlimna leh infiamna hun hmang tur branch eng emaw zat an awm. Zai lama intihsiakna hun atana hmang tur an awm nual bawk.

CYMA President chuan YMA Day thuchah tichhuakin, YMA chu politics rawng kai lo tlawmngai pawl a nih angin a thil tum leh a thuvawnte member-te'n an chian thar leh a ṭul thu a sawi a, "Ṭanpui ngaite ṭanpui kawngah YMA-in theihtawp chhuahin hma kan la ṭhin a, YMA Day a lo thlen hian ṭanpui ngaite dap chhuaka ṭanpui turin member-te ka chah a ni. Mizo mipui thinlungah YMA hian thûk takin hmun a luah a, a chhan chu mi dangte ṭanpuitu a nih ṭhin vang a ni," a ti.

Lalhmachhuana chuan, ram leh hnam humhalh turin YMA-in theihtawp a chhuah ṭhin tih sawiin, "YMA chuan thâ a thlah dawn lo a, theihtawp chhuahin ke a pên zel dawn," a ti a; ram leh hnam humhalh turin YMA-in thawhpui theih loh a neih loh thu a sawi.

YMA-ah hian Zo hnahthlak zawng zawng an leng vek tih sawiin YMA President chuan, "Inpui a nihna lai hi YMA chuan a hre chiang em em a, pawl emaw, hnam/chi bil anga inlâk hran hi ṭha a ti ngai lo. Tun hnaiah Zo hnahthlak unaute'n harsatna nasa tak an tâwk a, YMA chuan theihtawp chhuahin a lo ṭanpui tawh ṭhin a, a tlanchhe ngai dawn lo," a ti.

CYMA President chuan, hma­sawnnain kawng hrang hrangin Mizote a nuai mek tih sawiin, "Ruihhlo bakah, technology leh culture-in min nuai. Mizo takin a changkan theih a, kan nun ze mawi leh tlawmngaihnate a bo mai loh nan ṭhalaite hian ngaihtuahna thar kan sên a ngai," a ti bawk.

YMA-ah hian member 4,09,601, branch 821, group 50 leh sub-headquarters pariat an awm mek a ni.