Home Minister-in Forensic a tlawh

Home minister K Sapdanga chuan nimin khan Forensic Science Laboratory (FSL) direc­to­rate a tlawh a, hnu chhui­na khawl leh hman­raw pawi­mawhte a en bakah, FSL officer-te nan an inkâwm a, FSL Annual Report 2023-24 a tlangzarh bawk.

FSL conference hall-a FSL officer-te nen an inkawmnaah K Sapdanga chuan, hmasawnnain a ken tel avangin pawi khawihna leh misual hnu chhuite a hautak sâwt tih a sawi a, "Science thiamna hmanga uluk taka chhui a ngaih tâk zel avangin forensic laboratory pawimawhna a pung zel. Thawktute tam loin, indaih lo hle mah se, India rama misual hnu chhui kawngah Mizoram FSL an hmingṭha hle a ni," a ti.

FSL-a thawkte chu hnu chhuinaah an pawimawh ang bawkin, pawisawi lo thubuai neite chhuah zalenna atan hna pawimawh tak an thawh thu sawiin Minister chuan, "Pawi khawihna leh misual hnu chhui kawngah foren­sic leh cyber crime lam tih­­changtlun a ṭul," a ti a, chu'ngte chu police-te thâ tichak leh zual tura pawimawh ber pawl an nih thu a sawi.

Home Minister chuan, FSL directorate mamawhte a hriat thu leh hun remchang hmasaah thawm changtlun dan turte ngaihtuah a nih dawn thu a sawi a; thawktute chu an pawimawhna hre chianga theihtawp chhuah zel turin a fuih a ni.

FSL hotute chuan, thubuai khawih lai (pending) an neih loh thu leh, India ramah Mizoram FSL chauh chu case pending nei lo an nih thu an sawi.

FSL-ah hian laboratory division pariat - chemistry, fingerprint, questioned document, ballistic, DNA, photography, toxicology leh cyber forensic-te a awm.

NDPS Act, 1985 hnuaia hriattirna (notification) thar berin a phût angin, FSL-a sample thehluh chu ni 30 (qualitative ni 15 leh quantitative ni 15) chhungin endik a, result siam hman tur a ni.