State pahnih Power Minister-te inkâwm

Power & Electricity minister F Rodingliana chu June 13, Ningani khan a inah Assam Power minister Nandita Garlosa nen an inkâwm a; Mizoram leh Assam bakah, hmarchhak state dangte kawlphetha chungchangah intêl khawm a, thawhhona ṭha zawk neih dan tur an sawi dun.

F Rodingliana chuan, Ministry of New & Renewable Energy hnuaia Small Hydro Project Incentive Scheme aṭanga sorkar laipuiin state sorkar hnena ṭanpuina a pek ṭhin ennawn tura dah mek chu rang taka Central Cabinet-in a pawm theih nan bawhzui a ṭul thu a sawi.

North East Regional Power Committee (NERPC) intawhkhawm leh hunah Small Hydro Project Incentive Scheme chungchang sawiho a nih a theih nan NERPC Chairman a nih anga hmalakpui turin Assam Power Minister a sáwm a; Nadita Garlosa chuan, rawtnate chu pawimawh a tih thu a sawi a, hmalakho zel a nih tur thu F Rodingliana a hrilh.

State pahnih minister-te hian hmarchhak state-te'n kawlphetha siam chhuahna lamah theihna sang tak an nei chungin an la hnufûm hlea an hriat thu leh, ṭan lakna tur hrang hrangte an sawi bawk.