Mizoram Sports Conclave a ṭiak ; Rah ṭha a chhuah ngei ka beisei - Sports Minister

Ni hnih chhung Baptist Centre, Aizawla neih Mizoram Sports Conclave 2024 chu nimin khan a ṭiak. Sports & Youth Services minister Lalnghinglova Hmar chuan, Conclave chuan rah ṭha a chhuah ngei a beisei thu a sawi.

SYS Minister chuan, Mizoram Sports Conclave hlawhtling taka hman a ni chu lawmawm a tih thu sawiin, "Mizoram leh India rama infiammite hmasawnna kawngah rah ṭha a chhuah ngei beiseina sang tak ka nei. Conclave chhunga thu hrang hrangte zirhona piah lamah, sport association-te leh mikhual lo kalte’n remchangah la a, inbiakna leh hmalakhona hun remchangah an hmang a, a lawmawm hle," a ti.

Lalnghinglova Hmar chuan, Mizoram Sports Conclave hmalakna hnuaiah kum 2036 Olympics Games-a Mizoramin infiammi a tam thei ang ber a tirh theih beiseiawmna tur infiamna (sports discipline)-te thlûr bing a nih tur thu a sawi.

Tarlan tawh angin, Mizoram Sports Conclave hi June 13, Ningani khan chief minister Lalduhoma'n a hawng a; Assam Sports minister Nandita Garlosa leh Meghalaya Sports minister Shakliar Warjri te, India rama sport association hruaitu te, company leh media-a thawkte leh infiamna lam buaipuitute an tel a ni.