Congress hi Mizoramah remna a awm theih nana thawh hlâwk ber - Lalnunmawia

Congress Party chuan nimin khan Congress Bhavan-ah political session an nei a, an senior vice president Lalnunmawia Chuaungo chuan, Congress party chu Mizoramah remna leh muanna a awm theihna tura thawh hlâwk ber an niin a sawi.

Lalnunmawia Chuaungo chuan, "Congress party hi Mizoramah remna leh muanna a awm theih nana thawh hlâwk ber kan ni a, a mimal takin Pu Lal Thanhawla khan a thawh hlâwk berin ka hria. Ram buai hrehawmzia hre lo tam tak an awm tawh a, tunah chuan kan zalen ta a, Congress party zarah remna leh muanna a thleng a ni," a ti.

Congress party chu ram rorelna chelh leh turin an inbeisei tih sawiin Lalnunmawia chuan, "Chutih rual chuan, 'Congress party-in eng nge rorelna fawng chelh a ṭulna' tih hi kan inzawh fo a ngai," a ti a; mipui leh ram hmasawnna dah pawimawh hmasak ber a ṭul thu a sawi.

MPCC Senior Vice President chuan, ram rorelna ṭhaah mimal leh chhungkhua an changkâng a, a rálmuang ṭhin tih sawiin, "Mizoramah pawh mipui tuihâlna chu rorelna dik leh ṭha a ni a, chu chu kan pek a ngai," a ti.

Lalnunmawia Chuaungo chuan, Lok Sabha inthlanpuiah Mizoramah Congress party candidate thlan tlin a nih loh avangin Mizo mipui an inngaihtuah chian a ngaih thu a sawi bawk.