KHAWTHLIR

Thisen pe

Nimin khan YMA Day pualin Dawrpui Vengthar Branch YMA-in Civil Hospital Aizawl tan thisen unit 64 pein, petute mipa 61 leh hmeichhia pathum an ni a; Zotlang Branch YMA-in Synod Hospital tan unit 58 an pe a, petute mipa 52 leh hmeichhia paruk an ni. Kolasib College Veng Branch YMA-in District Hospital tan unit 29 an pe a, petute mipa 18 leh hmeichhia 11 an ni. Association of Surgeons of Mizoram pawhin nimin khan ZMC tan thisen unit 22 an pe bawk.

West-I online app

Aizawl West-I bialtu MLA TBC Lalvenchhunga'n Aizawl West-I bial puala a siamtir, 'Aizawl West One Online' tih application chu nimin khan a pisaah Lengzem editor Vanneihtluanga'n a tlangzarh. App-ah hian Aizawl West-I biala MLA fund leh sorkar department hrang hrang project te, project sum zat te, thawktute leh thil pawimawh dangte tarlan ṭhin tura ruahman a ni.

MLA-in hmanpui

Deputy chief whip W Chhuanawma, Tuichang bialtu MLA chuan nimin khan a bial chhunga Khawzawl Vengthar Branch YMA-in golden lubilee an lawm a hmanpui. MLA chuan, "Tumruhna leh thawhrimna hi hlawhtlinna bul pawimawh pahnih a ni a, hlawhtling tur chuan hloh huama chêt a ṭul a, hlawhtling tur chuan hlawhchham ngam hmasak a ngai," a ti.

Tanpuina dawng

Tun hnaia Mizorama khuarel chhiatna tuartute chhawmdawlna turin Central YMA chuan nimin khan Chin Community of USA, Chin TV leh Chin Crises Relief Community of USA aṭangin Rs 6,00,000 leh Chin Association of Maryland aṭangin Rs 82,000 an dawng.

MZU-ah workshop

MZU-a Department of Physics chuan June 13-14, 2024 chhungin MZU Guest House-ah 'International conference on energy- Efficient materials and workshop on Solar Cell Simulation Software SCAPS-1D' a buatsaih. Zirhonaah hian Stolkova Institute of Science and Technology, Russia-a mi Prof. Artem R Oganov chu keynote speaker a ni.