R Lalrawna leh Rozama Chawngthu Bhasha Samman dawng turin an thlang
Sahitya Akademi (National Academy of Letters) chuan mahni ṭawng hmasawnna atana thawh hlâwkte hnena an hlan ṭhin, Bhasha Samman dawng turin R Lalrawna, Electric Veng, Aizawl leh Rozama Chawngthu, Mission Vengthlang an thlang.
Sahitya Akademi chuan Bhasha Samman dawng tura R Lalrawna leh Rozama Chawngthu thlan an nih thu hi a tarlang a; remchang hmasaah President Droupadi Murmu hnen aṭangin Rashtrapati Bhavan-ah an dawng ang. Bhasha Samman hian Rs 1,00,000 leh thil dangte a keng a ni.
Sahitya Akademi chuan, R Lalrawna chu Mizo thu ziak lama thawh hlâwk tak a nih thu tarlangin, "Ṭawng lettu a nih bakah zirna hmasawnna atan theihtawp a chhuah ṭhin. Gilzom Publication-ah editor a ni a, Mizo ṭawng hmasawn zelna atan theihtawp chhuah ṭhin a ni," an ti.
Rozama Chawngthu chu thu ziak lamah Mizote tana thawh hlâwk tak a nih thu tarlangin Sahitya Akademi chuan, "Lehkhabu tam tak Mizo ṭawngin a let tawh. Thawnthute pawh a ziak a, Akashvani leh DDK-ahte chan ṭhin a ni," an ti a, zirtirtu ṭha chawimawina a dawn tawh thu pawh an tarlang.
Bhasha Samman hi kum 1997 khan James Dokhuma'n a dawng tawh a, kum 2014 khan B Lalthangliana'n a dawng tawh bawk.