Sorkarin ti vek tura rilru kan put chuan hmasawn a harsa - HM

Home minister K Sapdanga chuan, thil rêng rêng sorkarin a tih vek tura ngaihna rilru miin an put chhung chuan hmasawn a harsat tur thu a sawi.

YMA, Hmunpui Branch-in June 15-a an khaw community hall-a YMA Day an lawmna a hmanpuinaah Home Minister chuan, "Ram leh hnam humhalhna atana pawimawh chu intodelh tumna rilru put, mi dangte leh sorkar chunga innghat mai lo a, mahni tih theih apiangte a thawha thawh chhuah tum leh rilru thianghlim put a ni. Sorkarin ti vek tura rilru kan put chhung chu hmasawn kan harsat dawn," a ti.

K Sapdanga chuan, Mizoram leh hnam humhalh turin pi leh pute'n into­delh tumna rilru an neih ang kha neih a pawimawh thu sawiin, "Hmei­chhiat mipatnaah kan inthlahdah avangin kan ṭhalai zingah leh nu leh pa bakah pawisawi lo naupang thlengin natna ṭihbaiawm tak HIV/AIDS-in bu a khuar mek. Rin loh deuh deuhte vei an awm nuk tawh," a ti a, rilru insiamṭhat a ngaih thu a sawi.

Ram leh hnam humhalh chung­changa pawimawh ber chu ṭhalaite an nih thu sawiin Sapdanga chuan, "Ṭhalaiah pawh tlangvalte an ni. Tlangval rual, ram leh hnam tana innghahna tur zu leh ruihhlo vangin an thi zung zung mai, a manganthlak tak zet. Ruihhlo hi kan hnam hmelma a ni a, ram leh hnam kan humhalh dawn chuan kan hmelma kan hneh hmasak a ngai," a ti.

Home Minister chuan YMA Day pualin YMA member zawng zawng duhsakna chibai a bûk a; "Sorkar anga tih remchang lo - raltlan buaipui leh chhawmdawl chungchangah te, chhiatrupna a thlen chánga kawng tinrênga sorkar chawmdawl a, pui a, phungbawm ṭhintu chu YMA a ni," tiin, YMA chu Mizoram leh Mizote tan a hlu tak zet tih a sawi.