Chona kan hmachhawn nasa - Chief Minister

Chief minister Lal-duhoma chuan June 15, Inrinni khan YMA, Biate Branch-in YMA Day an lawmna a hmanpui a; Mizoram khawtlang nun­ah chona an hma­chhawn nasat thu a sawi.

Biate Branch president B Lallawmawma kaih­hruai inkhawmah Chief Minister chuan, "Khaw­tlang nunah chona kan hmachhawn nasa em em, khaw tin leh veng tina YMA branch-te'n mahni zâwnah theihtawp chhuaha kan beih lêt loh chuan ram leh hnam tichhe thei thil an ni," a ti.

Tui leh leilung enkawl danah insiamṭhat a ngai tih sawiin Lalduhoma chuan, "Nun thlahdah vanga kum naupang taka thihna te, nupa inṭhenna te, HIV/AIDS leh cancer-te a tam hle. Rûkrûk a hluar a, ṭhalai vâkrawlai an tam tual tual. Pi leh pute aṭanga kan neih Zo nun ze mawite a boral nasa ta. Hawh u, i din thar leh ang u," a ti a; mi tinin mahni hmazâwnah mawhphurhna an neih vek thu a sawi.

CM Lalduhoma chuan, Mizoram leh khawvel ram danga awm mek YMA member-te chu Biate aṭangin YMA Day chibai a bûk tih sawiin, "Khaw inlungrual leh thawkho thiam, faina ngainá leh khaw taima in nihnate a entawn tlak hle. Hmasawn zawng zelin kal ang che u," tiin Biate YMA member-te a fuih.

Chief Minister hian Biate Branch-in mi harsa, in luah tur hmu mai lote tlan luh lailâwkna tur an sak mek puih nan Rs 3,00,000 a pe a, an mamawh dangte a theih anga a bawhzui tur thu a sawi bawk.