Infiamna lama kan dinhmun medal-ah a lang ṭhin - SYS Minister

Sports & Youth Services (SYS) minister Lalnghinglova Hmar chuan, infiamna lama Mizoram dinhmun chu medal lâkah a lan chhuah ṭhin thu a sawi.

June 15, Inrinnia Lalat Sports Goods a hawnnaah Sports Minister chuan, "Infiamna kan lawm a, kan beisei nasa kan ti ṭhin. Game ṭhenkhatah kan theih deuh avangin ṭhaah kan inngai a, kan dinhmun dik tak erawh chu kan medal lakah a rawn lang chhuak leh ṭhin," a ti.

Lalnghinglova Hmar chuan, North East Games-ah Mizoram chu a la thlen san loh thu sawiin, "National Games-ah phei chuan medal lak tam chu sawi loh, qualify-na pawh kan nei tlem hle," a ti a; Mizo infiammite'n Olympic thlenga medal an lak theih nan theihtawp an chhuah dawn thu a sawi.

Infiamna bungrua pek chhuah vak vak ṭhin chu an titàwp tih sawiin SYS Minister chuan, "Dilna a lut nasa lutuk, sport association ni lêm lo thlengin an rawn dil ṭhin. Infiamna hmanrua quality lo deuh sem ṭeuh ṭeuh ai chuan kan sem chhun chu national standard tal ni se kan ti," a ti.

Sports Minister sawi danin, June 13-14, 2024-a Mizoram Sports Conclave an buatsaiha tel company ṭhenkhat nen infiamna lama Mizoramin hma a sawn theih nan an thawkho dawn a ni.