Hmun hrang hrangah YMA Day lawm

June 15, Inrinni kha YMA Day vawi 90-na a ni a, ram hruaitu - minister leh MLA eng emaw zatin hmun hrang hrangah an hmanpui.

PWD minister Vanlalhlana chuan Chhiahtlang YMA Coordination Committee buatsaih YMA Day lawmna Chhiahtlang khuaa Ramlai Community Hall-ah a hmanpui a; "YMA chu mi tin huapzo, kohhran, politics leh pawl àwn bik nei lo, Kristian nun dan ṭha chawisang a, khawtlang nun khalh ngiltu, ṭanpui ngaite ṭanpuitu leh pachhiate dâwm kângtu pawl ropui a ni," a ti.

Vanlalhlana chuan, bialtu MLA PC Vanlalruata, minister ni bawkin Chhiahtlang khaw chhunga YMA branch tin tan silpauline a thawn thu a sawi bawk. Chhiahtlang YMA Coordination Committee-ah branch panga - Kawng Veng, Zotuithiang, Hmar Veng, Chanmari leh Chhim Vengte an awm a; YMA Day lawmnaah hian lengkhawm zai intihsiak an nei a ni.

Minister PC Vanlalruata chuan Chhingchhip Joint YMA-in Chhingchhip Community Hall-a YMA Day lawmna an buatsaih a hmanpui. Minister chuan, Kristian nun dan ṭha ngaihsan leh a taka nunpui chu engtik lai pawha ngai pawimawh turin kal khawmte a chah a, "Aia upa zah hi kan hnam ro hlu a ni," a ti.

PC Vanlalruata chuan, YMA thil tum zingah hun âwl hman ṭhat chu tunlai ṭhalaite'n an zir thar a ngaih thu sawiin, "Mobile kan hman nasat hian kan nunah nghawng thui tak a nei thei a, mimal nun leh khawtlang nun thlengin harsatna a thlen thei. Chuvangin, mi tinin kan hman dan kan enfiah a ṭul," a ti a; 'aia upate zah' chu hnam ro hlu a nih thu sawiin, aia upa zah zir thar turin ṭhalaite a chah.

YMA Day lawm nan PC Vanlalruata hian Joint YMA hnenah tarpauline a pe a, branch pathuma YMA chhang hnenah Rs 1,000 ṭheuh a pe bawk.

Adviser to chief minister (Finance & Planning) TBC Lalvenchhunga, MLA chuan Kelkang Community Hall-ah YMA Day a hmanpui a; ngaihhlut tur dik tak ngaihhlut leh ngaihsan tur dik tak ngaihsan nachang hriat a pawimawh thu a sawi.

TBC Lalvenchhunga chuan, "Kut tling loa sum la leh hlêp ru ṭhinte dinhmun ṭhaa dah an ni leh ngaihsan an hlawh ṭhin hi sim a ṭul. YMA member leh Zoram mipui hi hlemhletna leh ruihhlo donaah ṭan kan lak ṭheuh a ngai a, nuam tih zawngte pêla pên chhuah ngam a ṭul," a ti.

Lunglei West bialtu MLA T Lalhlimpuia chuan Sialsir khuaah YMA Day a hmanpui a, Sialsir Branch YMA-in chawimawina an hlan.

T Lalhlimpuia chuan, "Sialsir khua aṭangin mi chhuanawm tak tak an lo chhuak tawh a, chu'ng zinga chhiar tel ve ka ni hi ka lawm hle. Sialsir hi khaw taima, mahni intodelh khua in ni," tiin, sorkar thar malsawmna mahni dawnthleng ṭheuhah dawng thei tura taimak chhuah turin a fuih a ni.