Taekwondo National Poomsae Seminar khâr

Sports & Youth Services minister Lalnghinglova Hmar chuan June 15, Inrinni khan Mizo High School Multipurpose Hall-ah Kukkiwon Advanced Taekwondo National Poomsae Seminar khârna a hmanpui a, "Ṭhalaite infiamna kawnga mi hlawhtling ni tura chher chhuah hi Mizoram sorkar tum pawimawh ber a ni," a ti.

Ni thum awh seminar hi Taekwondo Federation of India buatsaih niin, Mizoram Amateur Taekwondo Association (MATA)-in a thleng a; South Korea aṭangin grandmaster Prof. Hee Do Kim leh grandmaster Lee Jae Ku ten theory leh practical class an neihpui ṭhin. Mizoram, Assam leh Arunachal Pradesh aṭangin mi 74 an tel a, training completion certificate an dawng vek a ni.

SYS Minister chuan, South Korea aṭanga grandmaster lo kalte inpekna fakawm a tih thu a sawi a, "Ṭhalaite infiamna kawnga mi hlawhtling ni tura chher chhuah hi Mizoram sorkar tum pawimawh ber a ni a, national level bakah international level-a thangchhuah turin Mizo infiammite tan ṭan kan la a ni," a ti a; kum 2036 Olympic-ah Mizote'n taekowndo-ah medal an lak theih nan tun aṭangin theihtawp an chhuah dawn thu a sawi.

Mizote chu a tìra phûr hlut a, a hnua peih rei lo an nih fo thu sawiin Lalnghinglova chuan, "National leh international level-ah mi ti tak takte nen kan inel tawh ṭhin si a, keini pawhin kan tih tak tak ve a ngai tawh. Kan infiammite'n taimakna leh tumruhna, insûmtheihna leh dawhtheihna nen theihtawp an chhuah a ngai," a ti bawk.