KHAWTHLIR

Thisen pe

YMA Day pualin YMA, Thenzawl Field Veng Branch chuan June 15, Inrinni khan Thenzawl Presbyterian English School-ah thisen pek rûnpui an huaihawt a, Lunglei Civil Hospital tan thisen unit 71 an pe a, petute mipa 66 leh hmeichhia panga an ni. Siaha Joint YMA leh 20th Assam Rifles pawhin District Hospital-ah thisen pek huaihawtin, thisen unit 29 an pe a, petute mipa 24 leh hmeichhia panga an ni.

YMA-in in saksak

YMA, ITI Veng Branch-in an venga hmeithai pakhat in an sak ṭhat chu June 15, YMA Day zing khan Central YMA president Lalhmachhuana'n a hawng a, YMA Day thilpek atan a neitu hnenah a hlan. In hawnna inkhawm, ITI Veng YMA president R Lallawmsanga kaihhruaiah CYMA President chuan, "YMA hi ṭanpui ngaite ṭanpuitu a ni a, pawl zahawm leh thianghlim a ni," a ti a, YMA Branch-in hmeithai in an saksak chu ropui a tih thu a sawi.

Minister kâwm

Lok Sabha MP atana thlan tlin Richard Vanlalhmangaiha chuan June 14, 2024 khan Ministry of Tribal Affairs minister Jaul Oram chu a chenna inah a kâwm a, sorkar laipui aṭanga Mizoramin puih a mamawhnate a thlen. Tribal Affairs Minister chuan, Mizoram hmasawnna a ngaih pawimawh thu leh thawhhona ṭha tak neih zel a beisei thu a lo hrilh a ni.

Ruihhlo that lohzia inzirtir

Foundation for Drug-Free Mizoram chuan nimin khan Zarkawt Presbyterian Kohhrana Youth for Christ inkhawmah 'Ruihhlo tel lo nun duhawm zawk' tih thupui hmangin ruihhlo ṭhat lohzia inzirtirna hun an hmang. Inkhawmah hian chief minister Lalduhoma pawh a tel. CM chuan Mizoram sorkarin ruihhlo tih takzeta a do dawn avangin Mizoramah ruihhlo zuar leh ti mite an chêp tawh dawn thu a sawi. He hunah hian tleirawl 150 te chu an duhthlanna ngeiin, ruihhlo laka fihlim turin an intiam.